Shillong, Ïaïong 28:
U Symbud Myntri Rangbah ka jylla, u Bah Prestone Tynsong, u la shong jingïalang baroh shisngi ha kaba u la pynïaid ïa ka jingïalang bad ki karikor (engineer) ka tnat PWD (Roads & Buildings) ha kaba la ïatai bun ki mat bad ki jingeh ban pyntrei ïa ki projek shna surok ha ka Jylla.
Ïa kane ka jingïalang la pynlong ha Shillong Club ha kaba la wan ban ïashimbynta da ki karikor bad ki ophisar ka PWD (Roads & Buildings) kiba la ïakren kumno ban pynïaid shakhmat ïa ki projek bapher bapher ha ka jylla.
U Bah Prestone u la ong ba bun ki mat la ïakren naduh ka jingduna bad ka jingdon ki nongtrei, ka jingeh kaba ïakynduh ka jingduna ka pisa bad ka jingeh ban pynïaid shakhmat ïa ki projek namar ka jingbym ïoh jaka.
U Bah Prestone u la ong ka jingïalang ka la ïathir bha ha kaba ïadei bad ka jingpyntreikam ïa ka PMGSY bad ïa ki skhim kiba la bei tyngka da ka sorkar pdeng bad ka sorkar jylla ha baroh ar tylli kitei ki tnat sorkar.
U la ong ba ha katei ka jingïalang, ki ophisar bad karikor ki la iatai bun tylli ki mat bad ai jingmut ïa kaei kaba bha tam kaba ka Sorkar Jylla ka dei ban leh na ka bynta ban pynsuk pynsaiñ ïa ki paidbah bad ïa ka jylla baroh kawei.
Ha kaba ïadei bad ka jingud ba ki don ki kontraktor kiba shna torti ïa ki surok bad kitei ki surok kim ju neh slem, na ka liang u Bah Prestone u la jubab da kaba ong, “Ngi lah ïatai ha kaba ïadei bad ka Quality Control bad ngin buh ïa ki aiñ ki kanun ki ban pyrkhing bad kiba khlaiñ bha, khnang ba kino kino ki kontraktor kiba pyntrei ïa kano kano ka kam, ka dei ban long kaba janai bad ba kin pyndep ruh ïa ka kam katkum ka por ba la buh la ka long shi snem ne 15 bnai bad ki dei ban bud ryntih ïa katei ka jingbuh por”.
Ha kaba ïadei bad ka jingkhapngiah bad dheng kali ha nongbah Shillong, u Symbud Myntri Rangbah u la ong ba ka sorkar kan ïaleh ban pynbun ïa ki surok kiba pynïasoh (Link Road) ha ka nongbah Shillong, Jowai bad Tura, bad kiba dang ïaid ha kaba ïadei bad kane ka bynta, na ka bynta ban leh ïa ki Ring Road, hynrei ka jingeh kaba mih kam dei satia ba ka sorkar kam ïoh ïa ka pisa hynrei kam ïoh ïa ka jaka.
“Ngi hap ban ïatai bha ïa kane ka mat, kumno ban pyntikna ba ngin ïoh ïa ki jaka, namar don teng teng ba la pyllait ïa ka pisa na ka bynta ka projek, hynrei ki kam ki sahkut noh namar ka jingbym ai jaka ki katto katne ngut” u la ong.
