Mawkyrwat, Ïaïong 23:
Ka Voice of the People Party (VPP) hapoh ka jingïalam u Bah Ardent Miller Basaïawmoit kum shi bynta ban pynkhlaiñ shuh-shuh ïa ka seng ha man la ki konstitwensi, ha ka Sngi Thohdieng ka la hiar sha Mawkyrwat, South West Khasi Hills District na ka bynta ban pynrung dkhot thymmai sha ka seng.
Ha kane ka sngi, na ka liang u Bah Basaïawmoit uba long ruh u President Rangbah ka seng, u la ïoh ban pynshai ïa ka nongrim treikam jong ka seng. Hadien ka jingïalang, ka seng ka la ïoh ruh ban pynrung dkhot thymmai ha kaba palat spah ngut ki paidbah jong ka South West Khasi Hills ki la leit ban pynrung kyrteng ïalade bad ka VPP.
Haba ai jingkren ha ka jingïalang, u President u la ther tyngeh ïa ka Sorkar MDA halor ka jingpyndonkam bakla jong ka ïa ka bor da kaba pynsyrwa kai ïa ka pisa u paidbah da kaba thung ‘Chairman’ bad ‘Adviser’ wat ïa kiba la rem ilekshon ha ryngkat ka jingsiew kaba heh.
U la pynshai ruh ba ka thong jong ka VPP ka long ban rat dyngkhong ïa ka bamsap-bampong napoh ka Jylla bad ong ba ka seng, “Ban bam ïalade ruh ka nym bam bad ban bam kiwei ruh kan ym ai lad,” ha kine ki 5 snem namar ba ka Sorkar ka la leh sat ïa u paidbah bad pynhiar ruh ïa ka ïoh ka kot haduh ba ka Jylla mynta ka don hapdeng ka jingkit ram.
Ha kane ka sngi la synran lang da u Bah Adelbert Nongrum, MLA ka North-Shillong, Bah Brightstarwell Marbaniang, MLA ka Mawlai bad kiwei-kiwei ki nongïalam ka seng.
