Mumbai:
Ka Filmfare Awards kaba long kawei na ki jingsam khusnam ba kongsan jong ka India bad kaba la pynlong ha Jio Convention Centre, Mumbai ha ka sngi Palei mynmiet ka la khring ia kiba bun ki nongshna phlim, direktor, nongpynmih phlim bad kumjuh ruh ki khlur ak phlim ha kaba mynta u snem. Ha kane ka kynti ba mynta ka phlim Gangubai Kathiawadi ka la ioh khur haduh 10 tylli ki khusnam.
Ha ka 68th Filmfare Awards, ka phlim Gangubai Kathiawadi ka la rah ia ka nam Best Film, Best Director, Best Actress bad ha kajuh ka por la pynkup burom ruh ia uwei na ki khlur ak phlim ba la slem jong ka Hindi Cinema u Prem Chopra da ka Lifetime Achievement Award.
Ia kane ka jingsam khusnam la pyniaid da u Salman Khan bad Maniesh Paul bad nalor ka Gangubai Kathia wadi kiwei kiwei ki phlim kiba la iohpdiang khusnam ki long ruh ka Badhaai Do.
Mynta ka kynti ka Alia Bhatt ka la iohrah ia ka nam Best Actress na ka bynta ka Gangubai Kathia wadi bad u Rajkummar Rao kum u Best Actor ha kaba dei bad ka Badhaai Do.
U Sanjay Mishra pat ia ka Best Actor (Critics’): na ka bynta ka Vadh bad ka Bhumi Pednekar pat na ka bynta ka Best Actress (Critics’) halor ka Badhaai Do bad ka Tabu na ka bynta ka Bhool Bhulaiyaa 2.
Ha kaba iadei bad ka Supporting Role (Male): la iohrah da u Anil Kapoor na ka bynta ka Jug Jugg Jeeyo bad Best Actor in a Supporting Role (Female) ka leit sha ka Sheeba Chaddha halor ka Badhaai Do bad Best Music Album: la rah da u Pritam na ka bynta ka Brahmastra: Part One – Shiva.
