Tura, Ïaïong 28:
U Myntri Rangbah ka jylla, u Conrad K Sangma, ha ka Sngi Thohdieng u la leit jngoh ïa ki jaka ba la shna na ka bynta ki nongwan jngoh kai pyrthei ha Daribok kaba don ha kjat jong ka Nokrek Biosphere Reserve.
Ka jaka jngoh kai ha Daribok bad ka surok na Oragitok sha Daribok ki la nang khring ïa ka jingwan jong ki paidbah sha kane ka jaka bad ha kajuh ka por, ka la ailad ïa ki nongshong shnong ban plie ïa ki lad kamai kajih.
Namar ka jingbun jong kiba wan kai sha Nokrek, u Myntri Rangbah u la bthah ïa ki tnat sorkar ba kin ïatreilang bad ban wanrah ïa ki rukom treikam ban khanglad ïa ka jingbret pathar ïa ki plastik bad ki jaboh jabaiñ.
Ha kane ka sngi, u Conrad u la leit peit ruh ïa ka jingshna ïa ki ïing basa ha Daribok, bad u la ong ba kiba kum kine ki jingtei kin kyntiew ïa ki kam jngohkai pyrthei ha Rilum Garo.
Shuh shuh u Conrad u la bthah ïa ki bor sorkar ban ïakren bad ki trai shnong ban sdang ïa ki kam kum ka jingpeit bniah ïa kiba rung ba mih, ka jingpyndonkam da ki tiket ban rung sha katei ka jaka bad ka jingbuh ïa ki jaka pynïeng kali sha jngai na ka Nokrek Biosphere Reserve. U la pyntip ruh ba yn pyndonkam da ki kali ilektrik ban kit ïa ki nongwan jngohkai sha Daribok.
Nalorkata, u Conrad u la leit jngoh ïa ka Sadhana Forest Information and Learning Centre, kaba dei ka shlem kaba ai jinghikai ïa ki trai shnong ba kin pynneh pynsah ïa ki jingdon jingem ba ai ka mei mariang.
