Nongstoiñ, Ïaïong 28:
Ha 28 tarik u Ïaïong 2023, u Myntri Rangbahduh ka Ri, u Narendra Modi u la ïoh ban plie lyngba ka ‘Video Conferencing’ ïa 91 tylli ki ‘FM Transmitter’ kiba 100 Watt ha kaba 2 tylli na kine kiba la ïoh ban plie ha kane ka sngi ki kynthup ïa kiba la buh ha Community Radio Station, (CRS), Nongstoiñ, West Khasi Hills District bad ha Community Radio Station (CRS), Williamnagar, East Garo Hills District.
U ‘FM Transmitter’ ha Community Radio Station (CRS), Nongstoiñ un treikam ha u 100.1 MHz jong u ‘Band FM’, katba u ‘FM Transmitter’ ha Williamnagar pat un treikam ha u ‘Band FM’ 100.9 MHz.
Shuh shuh la khmih lynti ba kine ki ‘FM Transmitter’ ïa kiba la ïoh ban plie da u Myntri Rangbahduh ka Ri, u Narendra Modi ha kane ka sngi kin ai jingmyntoi shi kat dei eh ïa ki paidbah ka thaiñ lyngba ki prokram jong ki, ki ban pynbyrngia bad ai jingtip ruh sha ki paidbah nongshong shnong kiba ieid ban sngap ‘Radio’.
Ha ka jingïalang ha Nongstoiñ, la sakhi da ka jingdonlang u MLA ka Nongstoiñ, u Bah Gabriel Wahlang, u Bah V. Swer ADC ka WKHD, ki ophisar Sorkar, ki nonghikai, ki khynnah skul bad kiwei-kiwei kiba la shah khot sngewbha.
