Shillong, Ïaïong 28:
Ka tnat ka koit ka khiah ka Sorkar Jylla ka la pynbna ha ka sngi Thohdieng ba ka Jylla ka la don biang u nongpang uba la khlad noh ha West Garo Hills district namar u COVID.
Katkum ka jingïathuh ki briew ka tnat ka koit ka khiah, kane ka jingkhlad na ka daw u COVID, ka la jia biang hadien hynriew bnai.
Haba ïathuh ïa kane sha ki paidbah lyngba ki lad pathai khubor, ka Myntri ka koit ka khiah, ka Kong Ampareen Lyngdoh ka la ong une u nongpang uba la khlad u don 46 snem ka rta, na West Garo Hills district.
Hynrei ka Kong Ampareen ka la ong ba wat lada une u nongpang u la khlad hap ban phah peit bniah biang lane test la une uba khlad u dei uba ïoh tang ka jingpang COVID ne u dei uba donlang bad kiwei pat ki jingshitom ha ka met.
Haba pynbna sha ki paidbah ïa kane, ka Kong Ampareen ka la ong ba kane ka jingpynbna kam mut ba ki paidbah kin tieng ki syier, namar ka dei ka jingpang kaba la dep mad bad ïaid lyngba ha ki snem ba la leit.
Kumta ka kyntu ruh ïa kiba wan na ki jaka kiba jur bha kiba ïoh COVID, ba kin shim ki lad jingïada dalade ïalade khnang ba lada don kano kano ka jingshitom, kan nym ban eh ïa ki bad ktah ïa kiwei.
Ka Kong Ampareen ka la ïathuh ba ka Sorkar Jylla ka long kaba pynkhreh ha ki jaka sumar bad shim ruh ki lad khnang ba kan nym saphriang kumba ka saphriang ha ki snem kiba la leit.
Haba kylli kumno ka Sorkar kan leh namar kiba bun ki paidbah kim pat ngeit ba ka dei ka jingpang COVID namar kiba khlad bunsien ki dei kiba la don lypa da kiwei pat ki jingpang jingshitom, ka Kong Ampareen ka la ong ba kum ki paidbah ym dei shuh ban tieng ban syier ne mutdur, namar la dep ïaid lypa ïa ka lynti jong ka jingshemphang bad la dep tip ba ka don kum kane ka jingpang COVID.
“Lada ki ngeit ne kim ngeit, ngi ieh ha ka jingstad jong ki paidbah, bad ngim kwah shuh ban ïohi ba kin bun biang kiba ïoh COVID bad ïa ka jinglong jingman ba ki bun kiba pang COVID bad hap ban khangdam,” la ong ka Kong Ampareen.
Namarkata, ka la ong ba wat ïa ka tika jingïada ruh ym lah ban pynbor, hynrei la ieh ha ki paidbah ba kin rai hi dalade.
Kumta ka kyntu biang ba lada don kano kano ka dak jingshitom, dei ban leit bran bran ban phah peit bniah ha ki jaka sumar bad ym dei ban pynslem ban leit shah sumar, kata ka jingpynslem kam dei ban long ka daw ban ïoh pang jur.
Haba ïadei bad ka jingai tika biang ha Jylla, ka Kong Ampareen ka la ong ba ka tika kan dei ka booster dose, bad haba ïadei bad ka tika, yn sa shim ïa ka rai ha ka jingïalang ka ban long ha ka sngi nyngkong, ka 1 tarik u Jymmang, 2023 ha ka jingdonlang u Myntri Rangbah u Conrad K Sangma.
Katkum ka jingai jingkheiñ ka tnat ka koit ka khiah, kiba shitom COVID ki don 17 ngut, ha kaba 4 ngut ki don mynta ha jaka sumar. Kiba dang shu ïoh thymmai ïa ka jingpang COVID ki don 8 ngut.
