Shillong, Ïaïong 28:
Ka Judicial Inquiry Commission hapoh ka jingkhlieh jong u Justice (Retd.) T. Vaiphei kaba la thaw ban tohkit halor ka jingjia ha Mukroh ha ka 22 tarik u Naiwieng jong u snem ba la dep ka la tohkit ïa uwei u nongsakhi ha ka Sngi Thohdieng.
U Justice (Retd.) Vaiphei u la ïathuh ba ki nongïasaid aiñ na bynta ka Sorkar Meghalaya, Assam bad nongshong shnong ka Mukroh ki la tohkit ïa u nongsakhi ba la phah da ka Jylla.
U la ong ruh ba sa uwei u nongsakhi uba ka Sorkar Jylla kam shym la lah ban phah ha ka Sngi Thohdieng yn sa tohkit ha ka Sngi Saitjaiñ.
“Ngan sa tohkit ïa u lashai bad hadien kane, ka jingtian bishar kan sa long ha ka 5 bad 6 tarik u Jymmang. Kino-kino ki nongsakhi kiba phah da ka Sorkar Meghalaya, ngan sa tohkit ïa ki,” la ong u Justice (Retd.) Vaiphei.
U la ong ruh ba shisien ba u la pyndep ïa ka jingtohkit ïa ki nongsakhi ka Meghalaya, un sa sdang ban tohkit ïa ki nongsakhi jong ka Assam.
U Justice (Retd.) Vaiphei u la ong ruh ba ïa ka samoi jong u la pynjlan sa na bynta 3 bnai ka ban kut ha u bnai Jylliew bad u kyrmen ban pyndep ïa ka jingtohkit hapoh kane ka por.
“…hynrei lada jia ba ngam lah ban pyndep, nga sngew ba ka Sorkar kan hap ban pynjlan ïa ka samoi jong nga,” u la ong.
Haduh mynta, 9 ngut ki nongshong shnong ka Mukroh ki la wan shakhmat ban pynsngew hakhmat jong ka Commission.
Kum ban shu kdew hangne, 5 ngut ki nongshong shnong ka Mukroh nalor u nongtrei ka tnat khlaw ka Assam (Forest Guard) ki la kyllon ïap hadien ba ki pulit Assam ki la siat sha u paidbah ha katei ka shnong kaba ha West Jaiñtia Hills ha ka 22 tarik u Naiwieng jong u snem ba la dep.
