Shillong, Ïaïong 30:
Ki ar ngut ki MLA ka seng People’s Democratic Front (PDF) ki lah ban rung pura noh ïalade sha ka seng National People’s Party (NPP) ha ka 6 tarik Jymmang, 2023 ha ka por nohphai sngi ha ka shlem treikam ka seng NPP ha Lower Lachumiere, Shillong.
Katkum ki khubor ba la ïohlum, la ïathuh ba yn pdiang burom ïa kine ki ar ngut ki MLA ka PDF da u President rangbah ka seng NPP u Conrad K. Sangma uba dei ruh u Myntri Rangbah ka jylla ha ka jingïadonlang u Symbud Myntri Rangbah ka jylla uba dei ruh u Vice-President ka NPP, u Bah Prestone Tynsong, u Symbud Myntri Rangbah ka jylla uba bat kum u General Secretary ka NPP, u Bah Sniawbhalang Dhar, ki MLA bad ki nongkitkam ka NPP.
Kine ki ar ngut ki MLA ka PDF ki long u Bah Gavin Mylliem na Sohra konstitwensi uba bat ruh kum u President ka PDF bad u Bah Banteidor Lyngdoh uba dei u MLA na Mawkynrew konstitwensi. Kine ar ngut kin sa rung lang bad ki nongkitkam na ki konstitwensi jong ki ha katei ka sngi.
Ki khubor ki ïathuh ba kine ki ar ngut ki MLA ryngkat ki nongkitkam kin sa khylliap lama noh ïa ka seng PDF namar ki la rung noh sha ka seng NPP.
Haba pyrshang ban ïakren bad u Bah Prestone u la shu ïathuh ba ki jingkylla ha ka saiñpyrthei kan long beit hapdeng ka 6 tarik haduh 8 tarik Jymmang bad ïa ki jingshisha yn sa paw pyrthei ha kitei ki tarik.
Kum ban shu pynkynmaw ïa ka PDF la seng ha u snem 2017 da u Bah Pynshngaiñ N. Syiem uba dei u CEM ka KHADC ha kito ki snem ha kaba ïa ka kam President la bat nyngkong eh da u Bah Ivanlum Marbaniang.
Hynrei, hadien katto katne bnai ba la dep ka ilekshon MLA ha u snem 2018, u Bah Pynshngaiñ u la mih noh na ka PDF bad u la leit pynïasoh sha ka NPP bad u la ïakhun ruh ïa ka ilekshon MDC ha u snem 2019 na ka NPP bad u la jop. Tangba, u Bah Pynshngaiñ u la phet noh na ka NPP bad u la leit ban phai biang sha ka Congress ha u snem 2021.
U Bah Banteidor u la ju bat teng ïa ka kam President ka PDF hashwa ban shimti u Bah Gavin. Lah ban kdew ba ha u snem 2018, ka PDF ka la jop saw ngut ki MLA. Hynrei na kine saw, ar ngut ki la leit pynïasoh sha ka NPP ha shwa ka ilekshon MLA mynta u snem.
