Nongpoh, ïaïong 30:
Hapdeng ka jingïam briew bad ka jingpait dohnud, ki bahaïing hasem, kiba ieid ba thoiñ lem bad ki nongshong shnong jong ka thaiñ Marngar hi baroh kawei, ha ka Sngi U Blei ki la pdiang ïa ka met kaba sah jong ka samla Walinda Binong kaba la khlad ha ka shlem ba ka pule, kata, ka Mody University kaba don ha Rajasthan ha ka 27 tarik mynta u bnai.
Ka samla Walinda, 19 snem ka rta, ka dei kaba pule ha ka School of Design ha Mody University kaba don ha Lakshmangarh, Sikar ha jylla Rajasthan. Kane ka samla ka la sdang ban pule ha kane ka skulbah naduh u bnai Risaw 2022.
Ïa ka met kaba sah jong ka samla Walinda, la leit ban shimti da u kpa jong ka, u Bah Ruby Binong lem bad ki bahaïing hasem ha ka jingsynran lang ki bor pulit ka jylla. Na Rajasthan, la wan kit ïa ka met da ka liengsuiñ haduh ban poi ha ka kad liengsuiñ jong ka Guwahati bad nangto la pynkit da ka kali tat haduh ban poi ha ka shnong ha Nongagang Marngar.
Ha kane ka sngi, la ïohi ïa ka jingïam briew bad ka jingsngewsih kthang jong ki bahaïing hasem, kiba ieid ba thoiñ bad ki paidbah nongshong shnong ka thaiñ Marngar tang mar ïa poi ka met jong ka samla Walinda ha ïing sah jong ka naba kim sngew lah ngeit bad mutdur satia ba kum kane ka apot kan wan jia ïa katei ka samla kaba stad, kaba shlur bad kaba don ruh ïa ka lawei kaba phyrnai.
Hashwa ban rah ïa ka met jong ka samla Walinda shapoh ïing, na ka liang ki nongïalam ka thaiñ Marngar ki la pynlong ïa ka leh niam leh rukom naba ki la ong ka dei ka jingïap mynsaw.
Ïa ka jingleh niam ba khatduh yn pyndep ha ka Lah Sngi U Blei da kaba thang hapoh ka jaka thang briew jong ka thaiñ Marngar.
Na ka liang u Bah O Binong, Rangbah Shnong ka Nongagang Marngar, u la pynpaw ïa ka jingsngewsih bad jingsngewkhia halor kane ka jingjia kaba la wanrah ïa ka jingduh noh ba khlem dei por ïa ka khun samla jong ka shnong. Kumta u la dawa ruh na ka sorkar ba ka dei ban shimkhia ban leh ïa kaba donkam khnang ba kum kine ki jingjia kin ym wan jia shuh hadien habud ïa ki khun samla ka jylla bad ka thaiñ Shatei Lam Mihngi hi baroh kawei.
