Mumbai:
Ka puron jong ka Bollywood ka Dimple Kapadia kaba la ak kum ka Savitri ha ka Web Series ‘Saas Bahu Aur Flamingo’,ka la kren halor ka jinglong donkam ki kynthei ban pyni ia ka jing long shlur jong ki ha kaba kim dei shuh ban dang sheptieng ban ak ne shim ia kano kano ka bynta ha ki phlim ne ban kren ia kaei kaba ki sngew iahap ne dei.
Ka Dimple ka sngew ruh ba kum ka riewkynthei ka donkam bha ban pyni bad ban ak ha ki bynta kiba ai mynsiem ia kiwei kiwei pat ki kynthei kiba don ha kane ka ri.
Kane ka puron kaba la don 65 snem ha ka jing iakren bad ki lad pathai khubor ka la ong ruh ba ha ki por bad snem ba la leit ki kynthei ki hap ban shu sngap ia ka jingpyniaid jong ki rangbah bad mynta ka la dei ruh ia ki ba kin leh ia kaei kaei kaba dei na ka bynta ka jingim jong ki.
Ka Dimple kaba la ak ha ki phlim kum ka ‘Saagar’, ‘Rudaali’, ‘Gar dish’, ‘Lekin..’, ‘Kaash’, ‘Prahaar’, ‘Narsimha’ and ‘Hum Kaun Hai’ bad kiwei kiwei ka itynnad ha kawei ka liang ba mynta bun ki kynthei ka Bollywood ki la trei shitom bad trei tyngeh ban kiew ha ka kam ba ki trei bad ha kajuh ka por kim salia shuh ban shim ia kano kano ka bynta ba la wan tyrwa ia ki.
Tang kawei ba ka Dimple ka sngewkhia mynsiem wat haduh mynta bad kane ka long ba ka jingsiew ia ki puron kam da heh than haba nujor bad ki tyngshop wat lada ki ak ne shim ia ki bynta ba sha khmat ha ki phlim.
Ka Dimple wat lada kala rangbah bha pynban haduh mynta ka dang ioh ban ak ia ki bynta kiba itynnad bha ha ki katto katne ki phlim bad kum juh ruh ha ki Web Series.
