Nongpoh, Jymmang 01:
Hadien ka jingmih jong ka jingkynnoh na ki ’riew rangbah bad ki paidbah kiba la mih pyrthei ha kine ki khyndiat sngi halor ka jingthmu die sop-sop ïa ka pung shnong ha Umroi Nongrah da u Rangbah Shnong, u Baiateilang Lapang, ha ka sngi Nyngkong u la ong ba ki paidbah nongshong shnong kiba bun la mih ban pynshai paidbah ïa katei ka jingkynnoh ha kaba ki la kam ba ka dei tang ka jingpynthohbria ïa u Rangbah shnong.
Ha kane ka sngi, ki paidbah nongshong shnong ba kynthup naduh ki rangbah, ki longkmie bad ruh kiba bat kam shnong, ki la mih ban leit jurip ïa katei ka pung shnong bad pynshai paidbah ruh ba ka jingkynnoh da u Rangbah Shnong barim, u Bah P Dkhar, u Bah Jewel Lyngdoh bad kiwei kiwei de kam dei satia kaba shisha kumba la mih ha ki lad pathai khubor. Hynrei, ka jingshisha ka long ba ïa katei ka rai ban die ïa ka pung shnong la shim da ka Dorbar Job Card bad ka Executive Committee jong ka shnong bad ym kumba la kynnoh ba u Rangbah shnong u thmu die sop sop marwei.
Na ka liang ka Kong T Makhroh, kaba dei ka Secretary jong ka VEC, u Bah J. Nongkseh, dkhot ka Executive Committee bad u Bah A.S Roy Malai kum u Adviser, ki la ïathuh ruh ba ïa katei ka pung shnong la long trai da ka VEC ym da ka Dorbar Shnong, bad ïa ka rai ban die ruh, la shim lyngba ka rai jong ka Dorbar Job Card bad ka Executive Committee jong ka Shnong.
Katba na ka liang u Rangbah shnong pat, kata u Bah Baiateilang Lapang, u la pynshai ba kam don satia kano kano ka jingleh sop-sop ne leh marwei halor katei ka pung, hynrei u la pynshai ba ka dei ka rai jong ki paidbah hi bad ba la kynnoh ïa u khlem da tip ïa ki jingshisha.
Halor kane ka bynta, na ka liang u Bah Baiateilang Lapang u la dawa ruh ba kitei ki ’riew rangbah kiba donkti ban kynnoh pyrshah ïa u ban ïalam bakla ïa ki paidbah, ba ki dei ba pynshai paidbah hapoh ka 48 kynta, lym kumta, na ka liang ka jong u ryngkat bad ka Dorbar Shnong kim banse ban hap shim pat da kiwei ki lad ki lynti.
