Nongpoh, Jymmang 01:
Da ka mynsiem jong ka jingsngewsih kthang bad paitdohnud, ki bahaïing hasem ryngkat bad ki nongshong shnong ka thaiñ Marngar ha ka sngi Nyngkong ki la pyndep noh ïa ka jinglehniam lehrukom khatduh ïa ka met kaba sah jong ka samla Walinda Binong kaba la khlad noh ha ka jaka pule ha Mody University jong ka jylla Rajasthan ha ka 27 tarik jong u Ïaïong, 2023.
Ha kane ka sngi, hadien ba ïa ka met kaba sah la pyndep ïa ka jinglehniam lehrukom katkum ka dustur tynrai jong ka thaiñ ryngkat ka kñia ka khriam na ka ïingsah. Nangta la rah pat sha ka jaka thang briew jong ka thaiñ Marngar ban thang pat ïa ka met jong ka samla Walinda Binong ha ka jingïadon ryngkat jong ki bahaïing hasem, ki nongïalam jong ka Kur Binong, ki paidbah ka thaiñ Marngar lem bad kiwei kiwei de kiba la wan sngewlem na kiwei kiwei ki jaka.
Kum ban shu pyntip, kane ka apot sep sngi kaba la wan jia ha kane ka longïing, na ka liang jong ka kmie, u kpa lem bad ka hynmen kynthei ba heh, ki dang don hapdeng ka jingïam paitdohnud bad ka jingbym sngewlah ngeit ba ka samla Walinda kaba ki ieid thep mynsiem kam don shuh ha kane ka sla pyrthei bad ka long tang kum ka jingphohsniew.
Ha kane ka sngi la ïoh ruh ban ïakren ïa u Kni Rangbah jong ka Kur Binong, u Bah Michael Binong uba la dawa jur ïa ka Sorkar India, ka Sorkar Jylla bad ruh ïa ka Sorkar Rajasthan ba ki dei ban shimkhia halor kane ka jingjia ba sngewsih kaba la wan jia ha ka longïing jong u Bah Ruby Binong da kaba pynlong ïa ka jingtohkit kaba bniah ban ïoh ïa ka jingbishar kaba hok wat lada dei ban phah tohkit da ka Central Bureau of Investigation (CBI).
