Shillong, Jymmang 02:
U Myntri Rangbah ka Jylla, Conrad K Sangma, ha ka Sngi Ba-ar u la pyntip ba ka Sorkar Jylla kan sa sdang ïa ka jingïakren bad ki kynhun bapher bapher halor ka jingpyntreikam ïa ka ‘Roster System’ hadien jong ka 15 tarik mynta u bnai.
“Ka Sorkar ka la ïoh ïa bun ki jingbatai na ki tnat bapher bapher halor kane ka kam bad ka Kynhun Myntri ka dang bishar ïa kine baroh bad ka jingïakren bad ki kynhun bapher bapher kan sa long hadien ka 15 tarik jong u bnai Jymmang,” la ong u Conrad haba kren sha ki lad pathai khubor ha ka Sngi Ba-ar.
“Ngin sa khot lang ïa baroh namar ngi sngewthuh ba kane ka kam ka dei kaba kongsan bha bad kumta baroh ki donkam ban ïadon bynta lang ban sngewthuh ïa ki jingshisha. Kumta ngin sa khot ïa baroh ki dkhot ka MDA, baroh ki seng saiñ pyrthei, baroh ki kynhun seng na ki thaiñ bapher bapher bad kiwei kiwei ki kynhun ba kongsan kynthup ïa ki nongïalam niam,” la ong u Conrad.
Shuh shuh u Conrad u la pyntip ba hadien ka 15 tarik mynta u bnai, kine ki jingïalang kin sa sdang ha ka kyrdan ka Sorkar Jylla bad kumjuh ruh ha ki kyrdan jong ki district haba donkam.
