Mumbai:
U Anupam Kher u la iohlad ban kynthoh ha kaba iadei bad ka jingbym iaid ka Laal Singh Chaddha, da kaba ong ba ka jingbym iaid kane ka phlim kam dei eh na ka jingshah kyntait (boycott), hynrei kawei na ki daw ka dei namar ka jingbym don ia ka khana kaba biang ka ban khring ia ki nongpeitkai.
U Anupam u sngew ba lada kane ka phlim ka don ia ka khana kaba biang kan ym mad jingeh satia kumne bad lehse ka dang lah hi ruh ban kamai ha ka Box Office.
Ka Laal Singh Chaddha kaba direk da u Advait Chandan bad kaba la ak da u Aamir Khan, Kareena Kapoor Khan bad Mona Singh ka dei kawei na ki phlim Bollywood ba pulom bha bad kane ka phlim kaba dei ruh ka remake jong ka phlim Hollywood ka Forrest Gump kam don satia ia kano kano kaba sngewtynnad ne itynnad kaba ki nongpeitkai kin kwah ban peit ia ka.
U Anupam uba la ak ha ka Kashmir Files kaba dei ka Blockbuster Film u sngew ba lada ka Laal Singh Chaddha ka long ka phlim kaba itynnad lehse kane ka phlim ka lah ban khring ia ki nongpeitkai kumba long kiwei kiwei ki phlim ba ak da u Aamir kiba kynthup ruh ka PK.
U Anupam ula bynrap ruh da kaba ong ba mynta ki nongpeitkai ki la tip bad nang ban jied ia ki phlim ban peit bad dei ruh na kane ka daw ba ki khlur ak phlim ki donkam bha ban peit nyngkong eh ia ka khana
Ha ka jingiohi u Anupam ka jingshah boycott jong kano kano ka phlim kan ym don jingktah lada ka khana jong ka phlim ka long kaba biang bad kaba khring ruh ia ki nongpeitkai.
Naduh ba la sdang ka jingboycott la ong ba ki katto katne ki phlim ki la mad ia ka jingduhnong kaba la ktah bha ia ki kompani pynmih phlim.
Shuh shuh dei ruh namar ka jingboycott ba ka Bollywood ka la duhnong bha namar ba ki phlim ba biang kim shim lah satia ban iaid ne kamai bha.
