Nongstoiñ, Jymmang 02:
Ki paidbah jong ka sor Nongstoiñ, ki la mih shakhmat da kaba rah ruh ïa ki kti ban pynpaw ïa ka dak jong ka jingkyrshan ïa ka Voice of the People Party (VPP) na ka bynta ban ïakhun ba donkam ban pynbeit bad pynkylla ïa ka bhah thung kam thung jam (reservation policy) hapoh ka Jylla.
Ïa kane la sakhi ha ka 2 tarik u Jymmang, 2023 hadien ba u Bah Ardent Basaïawmoit, President ka VPP u la khot ïa ki paidbah hadien ba kut noh ka jingkren ka jong u ha ka jingïalang pynshai halor ka mat jong ka bhah thung kam thung jam ïa kaba la pynlong hakhmat ïew Nongstoiñ, ba hato ki paidbah ka Nongstoiñ kin ai ne em ka jingkyrshan kaba pura ïa ka jingïakhih jong ka VPP ha kaba ki paidbah ki la mih shakhmat ban pynpaw ïa ka jingkyrshan ïa ka VPP halor katei ka mat jingïakhun.
U Bah Ardent haba ai jingkren u la ong, ka jingthmu jong ka VPP haba ka ïakhih ïa ka bhah thung kam thung jam kam dei ba ka bishni ïano ïano, kam dei ba ki kwah ban knieh noh ïa ka hok jongno-re-jongno, hynrei ka kwah ba kan don kata ka ‘policy’ bhah kam kaba shong hok kaba shongnia hapdeng ki ar jaidbynriew kiba don ha ka Jylla Meghalaya.
Nangta, u la ong ruh ba ka VPP kam wah ban batai stad lut ïa ka sorkar halor ka reservation policy, hynrei ka ong ïa ka sorkar ban khot ïa ka dorbar kyrpang ban ïatai lane ban thaw da ka committee kaba kyrpang ka ban peit bad bishar kumno ban pynthymmai ïa ka reservation policy da kaba yn don lang na baroh ar kynhun jong ki jaidbynriew ban pynlong dkhot ïa ki ha kata ka committee, ban don ruh da ki ’riew shemphang ban ïa bishar khnang ba kan nym long kaba noh shiliang.
Nalor kata, u la ong ruh ba kane ka Reservation policy kam long kaba shong hok kaba shong nia ba yn bteng da kane ka juh ka policy. Kumta dei halor kane ka nongrim ba ka VPP ka ong ïa ka sorkar ba dei ban khmih biang lane peit biang ïa kane ka bhah thung kam thung jam.
“Lada ngi don tang saw ngut ruh ngin ïeng ban ïasaid ïa ka jingeh jong ka jaidbynriew bad lada ka sorkar kan pyneh ïa ka kam ïap kam im jong ka jaidbynriew, ngin mih sha surok ryngkat u paidbah ban pyndem ïa kane ka sorkar, ka sorkar kaba kuman ka sorkar kaba kynriang,” la ong u Bah Ardent.
U Bah Ardent u la kyntu bad khot ruh ïa ki paidbah da kaba ong ba “Long kiba pynkhreh haba ka VPP ka khot ïa ka jingïakhih pyrshah ïa ka sorkar ha kane ka kynti kaba mynta,” da kaba u la bynrap ba lada ym lah mynta ban wanrah ïa ka jingkylla kan ym don shuh da kawei pat ka por, bad ka VPP ka don tang kawei ka rukom pyrkhat shwa ban leit na kane ka pyrthei ka kwah ban ai ïa ka lawei kaba shngaiñ na ka bynta ki pateng ban dang wan.
Shuh shuh u la ong ba ka VPP kam dei ka seng kaba shu wan tang ban ïakhun ilekshon, hynrei ka ïeng ban ïakhun na ka bynta ki mat jong ka ri bad ka jaidbynriew bad u la ong ba ym don uwei napdeng jong ngi ki ban im sah ha kane ka sla pyrthei. Kumta shuwa ba ngin leit na kane ka sla pyrthei ngin ieh ha ki longdien ïa ka lawei kaba shngaiñ bad kaba suk ba saiñ. U la bynrap ruh da kaba ong, “Ngi la mih shakhmat ban ïalam ïa ka jingïakhih, nga ngeit ki paidbah kin nym ieh ïa ka VPP.”
Ha katei ka sngi nalor u Bah Ardent la donlang ruh ki nongkitkam ba hakhmat ka VPP ka Jylla kumjuh na Nongstoiñ, da ka jingwan ban sakhi lang ruh da ki ’riew rangbah ki longkmie, ki samla bad ki spah ngut ki paidbah.
