Khang ki Karbi ïa ki nongshong shnong Khanduli ban leit rep sha la ki pynthor ha shnong Karbi

Jowai, Jymmang 02:

Ka shongsuk shongsaiñ sha ki thaiñ khappud ha West Jaiñtia Hills District kam pat wanphai pura namar kat haduh mynta mynne ki nongshong shnong jong ka shnong Khanduli kin dang hap mad ïa ki jynjar na ka jingleh kuman ki briew na ka jaidbynriew Karbi.

          Ki briew jong ka jaidbynriew Karbi ki la khang lad khang lynti ïa ki nongshong shnong Khanduli ba kin leit rep leit riang sha la ki pynthor ki hali kiba don sha ki shnong Karbi kum ka Myni, Umpawiang bad kumta ter ter.

          Kane ka jingkhang ïa kine ki nongshong Khanduli da ki Karbi ka la wanrah ïa ka jingduh kaba khraw bha ïa ki nongshong shnong Khanduli namar mynta ka dang dei ka por bet ïa symbai sying ha ki lyngkha. Hynrei, da katei ka jingkhang lynti ïa ki nongshong shnong ka Khanduli mynta kim ïoh lad satia ban leit bet symbai.

          Haba ïakren bad u Waheh Shnong ka Khanduli, u Bah Yooshida Nongspung, u la ïathuh ba ka jingkhang da ki Karbi ka long thik tang ïa ki nongshong shnong Khanduli namar ba ka Khanduli ka pyrshah ïa ka jingbuh ïa ka ‘Entry Tax Gate’ ne ka khyrdop khrong khajna ba la buh da ka Karbi Anglong Autonomous Council.

          Kum ban shu pynkynmaw, ka Dorbar Shnong Khanduli ka la pynlong ïa ka jingpakhang ïa ka leit ka wan lyngba ka Shnong Khanduli naduh ka 4 baje mynstep jong ka 22 tarik u bnai Ïaïong; kaba mut ki briew na ri lum Jaiñtia kin nym ïoh leit sha Karbi bad na Karbi kim ïoh wan sha Jaiñtia. Hynrei ka Dorbar Shnong ka la weng noh ïa kane ka jingpakhang ha ka 25 tarik u bnai Ïaiong.

          Shuh shuh ha ka 24 tarik Ïaïong, ka Dorbar Shnong Khanduli ryngkat ki seng bapher bapher na ri-lum Jaiñtia ki la pynpaw ïa ka jingpyrshah halor katei ka khyrdop hakhmat ka Deputy Commissioner jong ka West Karbi Anglong District ka Krishna Baruah ha shnong Khanduli.

          Ki nongïalam seng ki la pynpaw ha ka DC ba katei ka jaka ba wan buh khyrdop ka KAAC kan dang hap pura hapoh u pud u sam jong ka shnong Khanduli katba ym pat dep pynbeit pud pynbeit sam da ki sorkar jong Assam bad Meghalaya.

          Ki la dawa na ka DC ban weng noh ïa ki pulit Assam ba la buh ban ap pahara ha shnong Khanduli namar lada la weng ïa ka khyrdop lum khajna bai rung jong ka KAAC ka jingsuk ka la wanphai hi dalade sha katei ka thaiñ.

          Na ka liang jong ka Deputy Commissioner jong ka West Karbi Anglong ka la kular ban ïakren bad pynsngew sha ka KAAC halor ka jingpyrshah jong ki seng bad ka Dorbar Shnong Khanduli.

          Ka Deputy Commissioner ka la pynshai ruh ba jingbuh ïa ki pulit Assam ha katei ka jaka ka long kaba shipor na ka bynta ban pynneh ïa ka shongsuk shongsaiñ ha ka thaiñ.

          Nalor kata, ka la bynrap ba yn sa weng noh ïa ki pulit Assam ynda ka shongsuk shongsaiñ ka la wanphai.