Kyntait ki 2 ngut ki MLA ban ïathuh ïa ka rai jong ka CEC

Shillong, Jymmang 02:

Ki ar ngut ki MLA ka People’s Democratic Front (PDF) ki la kyntait ban ïathuh ne kren eiei halor ka rai ba la shim ha ka jingïalang jong ka Central Executive Committee (CEC) kaba ïadei bad ka khubor ba kin leit ban pynïasoh pura noh bad ka National People’s Party (NPP).

          Ka PDF ha ka Sngi Ba-ar ka la shong ïa ka jingïalang jong ka CEC ban ïakren halor kiba bun ki mat, hynrei ka la kyntait ban kren eiei halor ka rai ba la shim ha kane ka jingïalang, khamtam halor ka khubor ban don lang noh bad ka National People’s Party (NPP).

          Na ka liang u President bad u Working President ka PDF, u Bah Gavin Mylliem bad u Bah Banteidor Lyngdoh ki la kyntait ban ïathuh halor ki rai ba la shim ha ka CEC, hynrei ki la pynpaw ba kin sa pyntip beit ha ka por kaba biang.

          Katkum ka khubor ba la ïoh, hadien kane ka CEC kaba la long ha ka Sngi Ba-ar, na ka liang jong ki nongïalam ka PDF kin sa khot ruh ïa ka General Council ha ka 4 tarik ha shwa ban rai khylliap lama noh ïa ka PDF bad ban pynïasoh pura noh sha ka NPP.

          Wat la ki nongïalam ka PDF kim shym la ïathuh eiei halor ka rai jong ka CEC, hynrei ka khubor kaba tikna ba la lah ban ïoh lum ka la pynpaw shai ba baroh 2 ngut ki MLA ryngkat bad ki nongkitkam ka PDF kin don noh sha ka NPP da kaba pynïasoh pura ha ka 6 tarik mynta u bnai.

Ha kawei pat ka liang ka National People’s Party (NPP) ka ap mynta sa tang ïa ka People’s Democratic Front (PDF) ban shim rai halor ka jingwan ïasoh pura noh bad ka seng.

          Haba pyntip ïa kane ha ka Sngi Ba-ar, u National President ka NPP u Conrad K Sangma uba dei ruh u Myntri Rangbah ka Jylla u la ong, “Ngi la ïakren bad ki nongïalam ka PDF bad ngi la ïakren ruh bad ki halor ka lynti ban wan synrop lang noh bad ngi.”

          “La pyntip sha nga ba ka PDF ka dang ap ïa ka jingïalang jong ka Central Executive Committee katba ngi dang ïakren bad hadien kane kin sa pynlong sa ïa ka jingïalang General Council, bad namar kata, nga tharai ki nongïalam ka PDF kin dei kiba biang eh ban ïathuh ïa phi ïa kaei ka rai ba ki la shim,” u la ong.

          Haba kylli la ka don ka jingkular shuki Myntri ïa ki MLA ka PDF, u Conrad u la ong, “Ïa mynta hi ngi dang ïakren tang ïa kane ka kam. Kumta ngin ïa ap shuwa ïa ka rai ba kin shim bad ngin sa shim rai pat kumno ba ngin jam shakhmat.”

          Ka PDF ka don ïa arngut ki MLA, kita u Bah Banteidor Lyngdoh na Mawkynrew bad u Bah Gavin M Mylliem na Sohra.

          Shuwa kane, u Bah Banteidor uba dei u Working President ka PDF u la ong ba ka seng kan sa shim ïa ka rai halor kane ka kam ynda la poi ka por.