Shillong, Jymmang 02:
Hadien ba ka la thikna ba baroh ar ngut ki MLA ka seng People’s Democratic Front (PDF) kin rung noh pura sha ka seng National People’s Party (PDF), mynta kin don sa katto katne ngut ki MLA na kawei pat ka seng riewlum ba ïatreilang ha ka sorkar MDA-II kiba la pynkhreh ban pynïasoh noh sha ka seng NPP.
Katkum ki khubor kiba la ïohlum, la ïathuh ba kine ki MLA kiba dang buhrieh ïa ki kyrteng ki lah ban rung pura noh sha ka seng NPP hapoh ka 8 tarik mynta u bnai shwa ba ki paidbah ka Sohïong konstitwensi kin leit ban thep ïa ka vote ha ka 10 tarik Jymmang ban jied ïa u nongmihkhmat sha ka ïingdorbar Thawaiñ.
Kum ban shu pynkynmaw ha kine ki sngi, u Symbud Myntri Rangbah, u Bah Prestone Tynsong u la kren ha ka jingïalang ïalap ilekshon ha Madanbitaw, Sohïong ba ka saiñpyrthei kan kylla hapdeng ka 6 bad 8 tarik Jymmang 2023. Hynrei une u nongïalam ka NPP um shym la ïathuh shai kiei kita ki jingkylla tangba u la ong ba na kane ka jingkylla, ka NPP kan sa kot sha ka 34-36 ngut ki MLA.
Lah ban kdew ba ar ngut ki MLA ka PDF, kita, u Bah Banteidor Lyngdoh na Mawkynrew bad u Bah Gavin Mylliem na Sohra ki lah ban pynïasoh pura noh bad ka NPP ha ka 6 tarik Jymmang.
Haba pyrshang ban wad jingtip shuh shuh, ki khubor kiba ki ïathuh ba ha ka 8 tarik Jymmang ki lah ban don sa kiwei pat ki MLA na kawei ka seng riewlum kiba lah ban leit pynïasoh pura sha ka seng NPP ban pynskhem ïa ka NPP kaba ïalam ïa ka sorkar MDA-II.
Shuh shuh ki khubor ki ïathuh ba lada jia ba ka jingïakren kam pat seisoh hapdeng ka NPP bad kita ki MLA na kawei na ki seng riewlum, ka jingrung jong kita ki MLA kan ym pat urlong, hynrei yn pyndep pat hadien ka ilekshon MLA ha Sohïong konstitwensi.
Ki seng riewlum kiba don ha ka sorkar MDA ki long ka UDP bad HSPDP, lait noh ïa ka PDF kaba la dep mih khubor ba ki ar ngut ki MLA kin rung noh sha ka seng NPP.
Kum ban shu pynkynmaw biang u Bah Prestone haba ïakren bad ki lad pathai khubor u la dep pynpaw ba ka seng NPP ka la khot lut ïa baroh ki seng kiba ïatreilang ha ka sorkar ba kin rung pura noh sha ka seng NPP namar kim kwah shuh ban shu ïatreilang tang ha ka sorkar, hynrei u kwah ba kin rung syndon sha ka NPP.
Kumba ka long mynta, ka NPP ka don 26 ngut ki MLA ha ka ïingdorbar Thawaiñ kaba don 60 ngut ki dkhot.
