Shillong, Jymmang 02:
Ka dkhot ka National Commission for Women (NCW) napoh ka Jylla, Kong Delina Khongdup ka la leit sha Rajasthan ban khmih bniah bad buddien halor ka jingkhlad ba kynsan jong kawei ka samla pule kaba dang 19 snem ka rta ha katei ka Jylla ha ka janmiet jong ka 27 tarik u Ïaïong mynta u snem.
Ïa kane la ïathuh da ka Coordinator ka Meghalaya State Commission for Women (MSCW), Kong A. Sohtun.
“Ngi la ïakren bad ka NCW lyngba i dkhot jong ka, Kong Delina Khongdup haba ïadei bad katei ka jingjia. Mynta i la don ha Rajasthan ban buddien ïa kane,” la ong ka Kong Sohtun.
Ka la ong ruh ba ha ka Sngi Balang, ki dkhot ka MSCW ba kynthup ïa ka Member Secretary kin sa leit mih sha ïingsah jong katei ka samla kaba ha Ri-Bhoi bad hadien kane yn sa lah ban batai kham bniah halor ka rai kaba ka Commission kan sa shim.
“Ngin sa ïakynduh ruh ïa ki pulit ban buddien halor ki sienjam kiba ki la shim na ka liang jong ki,” ka la ong.
Na ka liang ka MSCW lyngba ka Member Secretary, Kong V.H. Blah ka la phah ruh ïa ka kyrwoh sngewlem sha ka ïing ka sem jong katei ka samla.
Ha kajuh ka por, ka kyrwoh ka ong ruh ba ka tnad kan leh katba lah ha la ka bor ban pyntikna ïa ka jingtohkit kaba biang halor katei ka jingjia bad ban pynïoh kloi ïa ka hok.
Ïa katei ka samla la tip kyrteng kum ka Walinda Binong bad ka dei ka khun jong u Bah Rubi Binong bad ka Kong Kobita Syiem na ka shnong Nongagang Marngar ha Ri-Bhoi District.
Katei ka samla ka dei ruh kaba pule ha ka School Design, Mody University kaba don ha ka shnong Lakshammgarh, Sikar jong ka Jylla Rajasthan.
La kynnoh ba ki bor pynïaid jong katei ka skulbah ki la kam ba katei ka samla ka la dih bih bad phasi ïalade hapoh ka kamra sah jong ka ha katei ka skulbah.
Na ka liang ka ïing ka sem jong katei ka samla, ki la dawa jur na ka Sorkar India, ka Sorkar Jylla bad ruh na ka Sorkar Rajasthan ba ki dei ban shimkhia halor katei ka jingjia ba sngewsih da kaba pynlong ïa ka jingtohkit kaba bniah ban ïoh ïa ka jingbishar kaba hok wat lada dei ban phah tohkit da ka Central Bureau of Investigation (CBI).
