Shillong, Jymmang 02:
Ka jingkynnoh leh torti na ka liang ka Ganesh Das Government Maternal and Child Health Hospital, Shillong ka la paw biang sa shisien hadien ka jingsahkut u thyrnia ha ka met jong kawei ka longkmie kaba dang shu dep kha ïa i khyllung ha ka Lah Sngi U Blei.
“Katei ka jingjia ka la jia mynnin ha Ganesh Das ha ka por kumba 10:45 eiei mynstep. Hadien ba la kha ïa i khyllung, hap ban suh bad dei ha katei ka por ba u thyrnia u la kdiah bad rung shapoh,” la ong u Kñi jong katei ka longkmie, u Bah Donald Rani haba kren bad u nongthoh khubor.
Haba kdew ba na ka liang ki bor pynïaid katei ka jaka sumar kim shym la batai shai ha kaba nyngkong, u Bah Rani u la ong ba u la leit mih sha katei ka jaka sumar ha ka por 1 baje mynsngi ha kaba u la ïoh ban ïakren bad kawei ka nos kaba la ïathuh halor ka jingkdiah jong u thyrnia.
“Hadien kane, nga ruh nga mih noh, hynrei hadien, nga la ïoh jingtip lyngba iwei pat i paralok jong nga i ba don ha katei ka jaka sumar ba ki bor pynïaid ki la pynsngew ha i ba u thyrnia um don shuh, hynrei wat la katta ruh kin phah noh ïa i (longkmie) sha NEIGRIHMS tang na bynta ka ‘test’ bad im donkam hi ruh ban sah ha katei ka aspatal,” u la ong.
U la ïathuh ba ha ka por 6 baje janmiet u la leit biang sha Ganesh Das, hynrei ha katei ka por la pynkit noh ïa katei ka longkmie sha NEIGRIHMS.
Katkum ka jingïathuh u Bah Rani, ynda la poi ha NEIGRIHMS, mar-mar ki la leh ïa ka ‘X-Ray’ ha kaba ki la lap ba u thyrnia u dang don ha ka met katei ka longkmie. Ha kajuh ka por, la leh ruh ïa ka ‘CT-SCAN’ bad hangne ruh u thyrnia u la paw.
“Ki doktor ha NEIGRIHMS ki la ong ba u thyrnia um neh hajuh bad u la sdang ban sam shawei-shawei bad kumta ki la rai ba hap ban sei noh ïa u,” u la ong.
Na ka liang u Kñi jong katei ka longkmie u la ïathuh ruh ba ki doktor (ka NEIGRIHMS) ha ka Sngi Ba-ar ki la lah ban sei noh ïa utei u thyrnia ha ka por kumba 1 baje eiei mynsngi.
Haba kylli, u la ong, “Ha Ganesh Das ki la pyrshang ban sei, tangba kim lah. Kim shym la leh ruh ïa ka ‘X-Ray’.”
Shuh shuh u Bah Rani u la bynrap ba ka pyrsa jong u ka la sdang ïoh bor bad ki la sngewshngaiñ shibun hadien ba la lah ban sei noh ïa utei u thyrnia.
Ha kawei ka liang, u Kñi u la ïathuh ba ïa i khyllung la pynkit noh sha Nazareth Hospital, Shillong ha ka Sngi Ba-ar namar ka jingbym don ‘Ventilator’ ha katei ka jaka sumar (Ganesh Das), hynrei i la khlad noh ha kane kajuh hi ka sngi ha ka por kumba 11:20 mynmiet.
