Shillong, Jymmang 02:
Katba ki sngi ki la nang jan sha ka jingthep vote ha Sohïong, bad ka jingïalap ilekshon ruh ka la nang khluit, ki bor pynïaid ilekshon lem bad ki bor pulit ki la shim ki lad ki lynti kumno ban khanglad ïa kino-kino ki jingkulmar bad ban pynlong ïa ka ilekshon kaba ïaid beit bad kaba suk kaba saiñ.
Haba ïakren bad u Chief Electoral Officer (CEO), u Bah F.R Kharkongor, u la ong ba kum shibynta ban pynïaid beit ïa ka ilekshon, la dep ban kyntiew kyrteng ïa ki 32 ngut ki briew hapoh ki kyndon aiñ ban teh lypa ïa ki namar ki la don bynta teng ha ki jingkulmar. Kiba don suloi ki la dep ban wan aiti kumba 60 tylli ki suloi sha ki bor Sorkar.
U la ong ba ki jingpynkhreh ki la ïaid shakhmat haba ïadei bad ka jingthep vote ka ban long ha ka 10 tarik Jymmang bad ka jingñiew vote ha 13 tarik Jymmang.
Halor ki jaka ba don jingma, u CEO u la pyntip ba ki don 12 tylli ki jaka kiba don jingma, hynrei kumba ka long haduh mynta ym don kano-kano ka jingjia kaba pynthut ïa ka suk ka saiñ ha kano-kano ka bynta jong ka Sohïong konstitwensi.
Nalor kata, u la ong ba 5 pyrton ki pulit CAPF kin pahara ha baroh 63 tylli ki jaka thep vote hapoh Sohïong konstitwensi.
Haba ïadei bad ka jingkren ha ki rynsan ïalap ilekshon kiba lah ban pynkheiñ ïa ki kyndon pynïaid ilekshon, u Bah Kharkongor u la ong ba haduh mynta ym don ka jingujor ba don ki jingkren kiba pynkheiñ ïa ka kyndon pyrkhing ilekshon.
Shuh shuh u la ong ba ki bor pahara ki la ïoh ruh ban kurup kyiad katto katne, hynrei ym pat don ka jingïoh kurup pisa bad kiwei pat ki tiar kiba lah ban dei ki jingkhroh vote ha ka por ilekshon.
