Shillong, Jymmang 02:
Ka jingmih bun tylli ki rynsan pathai khubor kiba ym ithuh ithaw shuh, kiba pyni ruh ïa ki khubor ilekshon ha ka ilekshon MLA kaba la dep bad ha kane ka ilekshon kaba dang sah ha Sohïong konstitwensi, ka la wanrah shibun ki jingdkoh ha ka rukom pathai ïa ki khubor sha ki paidbah, khamtam namarba ki paidbah kim lah shuh ban ithuh kino ki lad pathai khubor kiba dei shisha bad kiba la ïoh jingithuh katkum ki kyndon aiñ ban pyni ïa ki khubor.
Kumta na ka liang ki bor pynïaid ilekshon ha kane ka Jylla ki la ong ba kino-kino kiba pyni ïa ki khubor kiba long kum ka jingpynkheiñ ïa ki kyndon pyrkhing ilekshon lane Model Code of Conduct, kin ngat ha ka jingshah ujor. Ynda la ujor, yn sa bishar ïa kita ki khubor kiba ki pynmih, hashwa ban leh ïa kaba donkam katkum ki kyndon jong ka aiñ.
Ïa kane la ïathuh da u Chief Electoral Officer (CEO) ka Jylla u Bah F.R Kharkongor haba ïakren bad ki lad pathai khubor, ha kaba u la batai ruh ïa ka jingthaw ïa ka Media Certification Monitoring Committee (MCMC) ban peitngor ïa ki khubor kiba pathai haba ïadei bad ka ilekshon naduh ka jingïalap ilekshon bad kiwei kiwei ki jingpynkheiñ ïa ki kyndon pynïaid ilekshon.
Lah ban kdew hangne, ba ki la mih bun tylli ki YouTube channel shimet kiba leh kum ki nongpathai khubor, kiba ju batai bad pyllait khubor ha ki youtube jong ki katba ki sngewbit khlem da tip bad bud ïa ki kyndon.
Ha ka jingshisha, ki kyndon pynïaid ilekshon ki ju pyrkhing bha ïa ki lad pathai khubor, bad ym lah ban shu leh pathar haba ïadei bad ka rukom pathai ïa ki khubor ha ka por ilekshon, la ka dei ki bynta kiba ktah ïa ka jingsngewpher jaitbynriew bad kiba lah ban wanrah ka jingïashun bad umsnam ha ka imlang ka sahlang bad ka Jylla.
Ïa ki lad pathai khubor la ju mana ban nym pathai shuh ïa ki khubor ïalap ilekshon hadien ba la kut ka por ïalap ilekshon, hynrei sha social media bad youtube channel jong ki riewshimet, ki don beit kiba pathai.
U Bah Kharkongor u la ong ba kiba pathai khubor khlem nongrim halor ka ilekshon, kaba long ka jingpynkheiñ ïa ki kyndon pynïaid ilekshon, kin shah ujor bad ka bynta kaba nyngkong ban peit ïa ka jingujor ka dei Committee kaba khlieh da u District Election Officer.
U CEO u la ong ba hadien ba la ïoh ïa ka jingujor, ka Media Certification Monitor Committee kan khmih bniah ïa kita ki rukom pathai khubor naduh ki jingbatai jong ki. bad haba la lap ba ka don ka jingpynkheiñ kyndon, kaba nyngkong kaba dei ban leh ka long ban phah jingthoh ban pan jingpynshai lane ‘showcause notice.’
Haba ïadei bad ka rukom ïalap ilekshon ki kyrtong bad ki seng saiñ pyrthei, na ka liang u CEO u la ong ba ha ka jingïalap ilekshon jong ki seng saiñ pyrthei bapher bapher ha ka por ilekshon, kan don beit ka jingkawang ktieh iwei ïa iwei bad ym lah lait ïa kata. Hynrei, lada ka rukom ïalap ilekshon ka ktah ïa ka jaitbynriew bad ka imlang sahlang, kin ngat beit ha ka jingpynkheiñ ïa ka Model Code of Conduct.
Nalor kata, u la ong ba haduh mynta ym pat don kano kano ka jingujor halor ka jingïalap ilekshon kaba long kum ka jingpynkheiñ ïa ki kyndon pynïaid ilekshon.
