Khliehriat, Jymmang 03:
Ki pulit jong ka East Jaiñtia Hills District ki la kem noh ïa ki saw ngut ki nong Bangladesh kiba rung be-aiñ shapoh u pud u sam ka ri India khlem ki kot ki sla.
Ki pulit ka East Jaiñtia Hills District hadien ba ïoh jingtip halor kane, ki la pynlong ka jingpynap shrip ha Infiltration Check Post ha Umtyra ha ka 2 tarik.
Ha ka por kumba 5:30 janmiet la ïoh bat ïa kawei ka kali kamai kaba don ïa u nombar ML11-5376 ryngkat bad san ngut ki briew.
Ha ka jingtohkit ïa ki kot ki sla, tang u nongñiah u Warif Uddin Laskar uba pyntikna ba u dei u nong India lyngba ka ID, katba ki saw ngut kim don ïa kino-kino ki kot ki sla pynshisha.
Shuh shuh ha ka jingtohkit bniah, kine ki saw ngut ki la phla ba ki dei na Bangladesh bad ki la rung sha India lyngba ka shnong Dona. Kumta la kem noh ïa kine ki saw ngut bad la ïalam ïa ki sha thanad Khliehriat bad pynngat ïa ki hapoh ka Foreigners Act.
Kine saw ngut ki nong Bangladesh ki long u Bhar Uddin 46 snem, u Kamil Ahmed 28 snem, u Koyson Ahmed 24 snem bad u Faisal Alam 21 snem.
Ïa u nongñiah u Warif Uddin Laskar na Saraspur Gumra Bazar, Katigorah, District Cachar, Assam ruh ki pulit ki la kem namar u dei uba juh kit ïa ki nongrung tuh sha India bad kurup ruh ïa ka kali jong u.
