Shillong, Jymmang 03 (UNI):
Ka Meghalaya High Court ka la bthah ïa ka Central Bureau of Investigation (CBI) ban tohkit halor ka jingshah siat ïap jong uwei na ki heh ka seng lehnoh Garo National Liberation Army (GNLA) kaba la jia ha u snem 2015 hadien ba ka la don ka jingkynnoh ba ka dei ka ‘fake encounter’.
Katei ka jingjia ka la jia ha ka 4 tarik Lber, 2015, ha ka shnong Romba Adinggre kaba hap hapoh ka jingpeit jong ka thanat Rongram ha West Garo Hills ha ka por ba ki pulit ki la leit thwet ïa ki dkhot ka GNLA.
Ha ka jingleit wad ïa kita ki lehnoh, ki pulit ki la lap ïa kawei ka ïing kaba don hajan ka Romba Adinggre Lower Primary School ha kaba la suba ba kita ki lehnoh GNLA ki la rieh tngen hangta.
Ki pulit ki la kam ba ki la dep pyrta shwa sha kita ki lehnoh ba kin mih shabar bad ban pyndem noh ïa ki tiar siat jong ki, hynrei kita ki lehnoh ki la siat pynban na ki ktang suloi.
Shuh shuh ki pulit ki la kam ba ha ka jingpyrshang ban ïada ïalade, ki la pynphai kylla sha kita ki lehnoh ha kaba uwei na ki nongïalam ka GNLA ïa uba la tip kyrteng kum u Sengbath Ch. Marak u la shah siat bad u la kyllon ïap hajuh.
Hynrei, u kpa jong u Sengbath, u Abal M. Sangma, uba la leit ujor mukotduma sha High Court, u la kam ha ka FIR ba u la ai pyrshah ïa ki pulit ba u khun jong u, u la shah pynïap dusmon ha ki pulit ba ki don ruh ki briew kiba la sakhi ïa kaei kaba la jia.
U Abal u la kam ba u Sengbath u la shah ïap ha uwei u briew ba la tip kyrteng kum u Mingran T Sangma bad ha kiwei pat ki pulit. Ïa ka kynhun pulit, la ïalam da u Bitching N Marak uba dei u Circle Inspector ka Tura, West Garo Hills.
Shuh shuh u Abal u la ong ba ha katei ka step, ki pulit ki la kawang da ki maw sha ka ïing ba u don u Sengbath bad ki la phah mih ïa u shabar bad ki la siat ruh sha suiñ.
Hadien ba u Sengbath u la mih shabar, u Mingran u la siat ïa u na kjat bad u la phah mareh ïa u bad hadien kata, u la siat biang ïa u. U Abal u la ong ba ki don ki briew kiba la sakhi ïa kaei kaba la jia.
“Katei ka jingjia ka dei beit ka ‘fake encounter’ ha kaba ki pulit ki la siat ïa u khun jong u nongmudui uba la khlem rah suloi lane uba la khlem siat satia sha ki pulit,” la ong u nongïasaid aiñ jong u Abal.
Ha kaba ïadei bad katei ka jingjia, ki la don ar tylli ki jingtohkit; kawei ka jingtohkit ba la leh da u majistor bad kawei pat da u District & Sessions Judge, Tura.
Ha ka kaiphod jong kine ar tylli ki jingtohkit, ki sakhi ki la ïathuh beit ïa kajuh bad kata ka long ba ki pulit ki la pynïap ïa u Sengbath hadien ba ki la phah ïa u ban mareh. Kine ki sakhi ki la ïathuh ba ki pulit ki la bteng ban siat haduh ba u Sengbath un da khlad.
Ban lap ïa ki jingshisha baroh, ka High Court ka la bthah ïa ka CBI ba kan tohkit halor katei ka jingjia. Kane ka kynhun tohkit ka dei ban ai ïa ka kaiphod jong ka hapoh lai bnai sha ka ïingbishar kaba dei khmih.
Ka High Court ka la bthah ruh ïa u Superintendent of Police, West Garo Hills ba u dei ban aiti ïa baroh ki kot ki sla kiba ïadei bad katei ka jingjia sha ka CBI khnang ba kan dup lah ban tohkit bniah.
