Shillong, Jymmang 03:
Ka Hynñiewtrep National Youth Movement (HNYM) ha ka sngi Balang ka la leit ban tur sha ka shlem treikam u Syiem ka Hima Mylliem da ka jingthmu ban khang tala ïa katei ka shlem treikam halor ki jingkynnoh ba ka la pynkupbor ïa ki Rangbah Shnong Garo ban peit ïa ka synshar ka khadar ïa ki briew kiba wan buhai shnong hapoh ka Raid Marwet.
Ha katei ka jingthmu jong ka seng ban leit khang tala ïa katei ka shlem treikam hapoh ka jingïalam jong u President, u Bah Louis Dohtdong, la ïohi ba ka la don ka jingïapynphai ktien kaba jur bad kaba da khluit tar haduh katta katta ha kaba na ka liang u Basan ka Raid Nongkseh, u Bah Nathaniel Thangkhiew u la ïaleh ban pynjai jai bad pynsngewthuh ïa ki dkhot jong ka seng.
Haba ïakren bad ki lad pathai khubor, u Bah Louis Dohtdong u la ong ba kane kam dei ka kam kaba dang thymmai halor ka jingpyrshah jong ka seng ïa ka jingleh ka Hima Mylliem halor ka jingpynkupbor ïa ki Rangbah Shnong Garo. Na ka liang jong ka seng, ka la ju ïai pyrshah na ka por sha ka por bad kaba sngewlyngngoh ka long ba wat hadien ka shithi kaba la dep phah da ka Hima Mylliem halor ka jingpynduh ïa ka bor ban long kum kita ki Rangbah Shnong, hynrei kine ki briew Garo ki dang ai hi pat ïa ki NOC ïa ki jaidbynriew Hmar bad Punjabi ban tih tyllong um. Kumta dei halor kane ka nongrim ba ka seng ka la pynbor ïa ka shlem treikam ka Hima Mylliem ban mait shi syndon ïa ki kyrteng jong kine ki jaidbynbriew Garo ban long kum kita ki Rangbah Shnong.
“Hadien ba ka seng ka la buddien ïa kato ka jinglong Rangbah Shnong jong ki Garo hapoh u pud u sam jong ka jaidbynriew bad ka khyndew ka shyiap ka jong ngi, ngi la long pyrshah bad hadien ba ka Hima ka la pyntikna bad ka la ong ba ka la ai shithi sha ki ba kim dei shuh ban kam ïalade kum ki Rangbah Shnong namar kim don ïa ka hok ban kam Rangbah Shnong hapoh ka khyndew ka shyiap jong ka Jaitbynriew ka jong ngi. Hynrei kaba sngewlyngngoh ka long ba dang ha u bnai Ïaïong jong ka taïew ba khatduh, kine ki Garo ki dang ai biang ïa ki NOC sha ki Jaitbynriew Hmar bad ki Jaitbynriew Punjabi ba kin tih tyllong um da ka jingaibor jong ki kum ki Rangbah Shnong,” la ong u Bah Dohtdong
U Bah Dohtdong u la ong ba hadien ba la ïohi ïa ka jingleh donbor jong ki Garo, ka seng kam banse ban tur shapoh ka Hima Mylliem ban pynbor ïa ka Hima ba ka dei ban pynduh noh ïa ki Rangbah Shnong Garo baroh. U la ong ba kane ka jingleh kam dei satia ka jingñiew beiñ ïano-ïano, hynrei baroh ki don la ki jong ki jong ki khyndew ki shyiap hynrei ban wan long trai ha ka khyndew ka shyiap jong kiwei khlem ka jingïoh bor kaba skhem ka long kaei kaei kaba ym lah ban pdiang satia.
“Kumba ka long mynta, ngi ïohi ba ka Hima ka la sdang ban shim nongkynti pynban sha lade da kaba ïadie ïathied jaka pathar hapoh Raid Marwet, ngi ïohi ba kito ki Hmar, ki Mizo, ki Naga ki la lah ban thied jaka bad shna ïing shna sem,” la ong u Bah Dohtdong.
Shuh shuh halor kane na ka liang ka seng ka la ai por 3 sngi ïa ka shlem treikam u Syiem ka Hima Mylliem ban hukum ïa ki Rangbah Shnong Garo kiba don hapoh ka Raid Marwet ban pynphai noh ïa ki kot ki sla ba donkam kum ki muhor bad ki letterhead bad na ka liang u President u la maham ruh da kaba ong ba lada ka ophis kam leh eiei na ka liang ka seng kan sa leh ïa kaba donkam.
