Nongstoiñ, Jymmang 03:
Ban pynpaw ïa ka jingsngewnguh bad sngewburom ïa ka Sorkar Jylla kaba la lah ban kyrshan ban wanrah ïa ka rukom tih dewïong kaba katkum kajuk stad saian, ha ka 3 tarik mynta u bnai, ki nongïoh ïa ka ‘mining lease’ na ka Sorkar Kmie kiba dei jong ka West bad South West Khasi Hills (project proponents mining lease holder), ki la ïoh ban pynlong ka prokram pynkup burom ïa u Myntri Rangbah ka Jylla u Conrad K Sangma uba la wan ban shim ruh ïa ka bynta kum u kongsan.
Ïa katei ka jingïalang la pynlong ha madan New Nongstoiñ ha kaba nalor u Myntri Rangbah ka Jylla la don lang ruh u MLA ka Nongstoiñ u Bah Gabriel Wahlang, u MLA ka Mawshynrut Bah Methodius Dkhar, u DC bad SP ka West Khasi Hills District, ki heh ophisar na ka tnat Mining and Geological ka Sorkar Jylla, ki paidbah bad kiwei kiwei.
Haba kren sha ki lad pathai khubor hadien ka jingïalang pynkup burom, u Myntri Rangbah u la ong, hadien kine kiba la ïoh ïa ka mining lease na ka sorkar India lyngba ka Coal Ministry ban sdang noh ïa ka rukom tih dewïong katkum ka juk stad saian ha ka Jylla, ki la khot sngewbha na ka bynta ka jingïalang pynkup burom ban ai khublei ïa ka sorkar Jylla halor ka jingkyrshan kaba ïadei bad kiba bun ki bynta ha ki san snem, kaba la pynlong pat ban pyllait noh ïa ka jingkhang tih dewïong bad ban sdang pat ïa ka rukom tih dewïong ba thymmai.
Nangta u la ong ba baroh ki don saw ngut kiba la ïoh pdiang ïa ka mining lease ha kaba ki hap ban leh sa ïa ka ‘state clearance’ kum ka Environmental clearance, pollution board bad kan don ruh ka jingïamir jingmut bad ki paidbah (public hearing) bad kiwei kiwei kiba dei satang ki kam kiba ha ka jingkhmih ka sorkar Jylla. Hadien ba la pyndep ïa ki jingdonkam baroh yn sa lah ban sdang noh kaba lah ban shimpor haduh 45 haduh 60 sngi eiei.
U la ong ruh ba ha ki por ki ban wan ki sa don shuh shuh ki ban aplai ban ïoh ïa ka mining lease ha kaba kin hap bud ruh ïa kajuh ka rukom kaba ki saw ngut ki la lah ban pyndep.
Namar kata, u la ong ruh ba katei ka sngi ka dei ka jingsah jingkynmaw namar ba la bun snem ki paidbah ka Jylla khamtam ki nongtrei tih dewïong bad kiba shaniah na kam bylla dewïong ki la mad ïa ki jingeh, bad ym tang ki paidbah hynrei ka sorkar kala duhnong ïa ka khajna kaba shyrkhei hynrei ngi kyrmen ba kine kiei kiei kin sa kylla noh nangne shakhmat.
U Myntri Rangbah u la bynrap ruh da kaba ong, “Hooid ngi tip ba ka rukom tih dewïong kan ym long shuh kumba la jia ha ki snem ba la dep namar mynta kane ka buit thymmai kaba long katkum ka juk stad saian yn hap bud ïa ki kyndon na ka bynta ban ai ka jingïada ym tang ïa ka mariang hynrei ïa ki nongtrei ruh.”
