Shillong, Jymmang 03:
U State President ka National People’s Party (NPP) u Dr Wanwei Roy Kharlukhi, u la ong ba lada ka United Democratic Party (UDP) ka kwah ban bujli sorkar hadien ka ilekshon MLA ha Sohïong, kumta kan bha lada weng noh ïa ka na kane ka Sorkar.
U Dr WR Kharlukhi, uba dei ruh u MP ka ïingdorbar Rajya Sabha haba kren sha ki katto katne ki nongthoh khubor, u la ong, ba kaei kaba ki la ïohsngew ka long ba ka UDP ha ka jingïalang ïalap ilekshon ha Sohïong ka la kren bad pynpaw ba kan sa don ka jingkylla ha ka Sorkar hadien jong ka ilekshon.
Shuh shuh katkum ka jingpynpaw ka jong u, ka jingkren jong u Bah Bajop Pyngrope uba dei u nongaiktien jong ka NPP ba kin bthah ïa ka UDP ban shong ha ka Liang Pyrshah, ka dei ka jingkren kynthoh halor ka jingkynthoh ba la wanrah shakhmat da ka UDP.
“Lada phi siat ïa ngi da uwei u khnam, kumta ngi ruh ngin hap ban siat da uwei pat,” la ong une u nongïalam ka NPP ha Meghalaya bad bynrap ba lada ka UDP ka don ïa kata ka jingpyrkhat ban pynkylla noh ïa ka sorkar na ka NPP. Kumta ka long kaba shai ba kin bret noh shi syndon ïa ka naba hadien ka ilekshon MLA kaba dang shu dep, ki la pyrshang ban ïaleh ban khanglad ïa ka NPP ban don ha ka Sorkar.
U Dr Kharlukhi u la ong, “Hynrei na ka liang ka UDP kam shym la lah satia ban khanglad ne jop ha ka jingthmu bad ha kaba ngi la lah ban thaw ïa ka Sorkar. Ngi la ai ar tylli ki shuki Myntri sha ki, haba ki la wan khrong na ngi. Kumta wat la ka UDP kan don shabar ruh kan nym ktah satia ïa ka Sorkar.”
Haba kylli hato kan don ne em ka jingkylla ha ka jinglong jingman ka saiñ pyrthei hadien ka ilekshon Sohïong, u Dr Kharlukhi u la ong ba um don jingtip satia haduh mynta kaei ka ban sa wan jia.
“Hynrei la tikna ba kan sa don kaei-re-kaei ka ban sa wan jia hadien ka ilekshon ha Sohïong, la kan dei kaba rit ne kaba heh, tang ka por kan sa batai,” la ong une u nongïalam ka NPP bad bynrap ba u don ka jingkyrmen kaba skhem ba ka NPP kan ïoh ka jingjop ha Sohïong.
