Shillong, Jymmang 03:
U nongïalap ilekshon uba hakhmat jong ka seng United Democratic Party (UDP) ha Sohïong konstitwensi, Bah Amazing Kurbah, u la pynpaw ba u Myntri Rangbah ka jylla, u Conrad K Sangma, um treh shuh ban ïaid nakhmat, hynrei u ïaid na kham kyndong ban leit ïalap ilekshon sha Lawmei namar u tieng ïa u Amazing.
Ïa kine ki kyntien u Bah Amazing u la kren ha ka jingïalang ïalap ilekshon u kyrtong ka UDP Bah Synshar Lyngdoh kaba la long mynta ka sngi ka 3 tarik Jymmang 2023 ha Weilyngkut. Ha kane ka sngi la ïadonlang u Myntri jong ka sorkar jylla, u Bah Paul Lyngdoh, Bah Kyrmen Shylla, Bah Pius Marweiñ, Bah Balajied Synrem, Bah Nujorki Sungoh, Bah Titos Chyne, ki MDC bad ki nongkyrshan kiba la poi palat hajar ngut.
U Bah Amazing u la ong ba ka jingkhih win ha kane ka ilekshon ha Sohïong ka dei namar ki nongïalam ka NPP kim pat lah ban pynphai nia ïa kaei kaba u la dep kren ha ki jingïalang.
Ha kajuh ka por u la ong ba ka NPP mynta ka la wanrah briew na shabar ban kanbas ilekshon ha Sohïong konstitwensi, hynrei ki paidbah ki la dep rai ban kyrshan beit ïa u kyrtong ka UDP.
U kyrtong ka United Democratic Party (UDP) na Sohïong, Bah Synshar Lyngdoh u la ong ba ki nong Sohïong konstitwensi ki la kwah ïa u nongmihkhmat ba un leit ban thaw aiñ ha ïingdorbar.
U Bah Synshar u la ong ba u ïeng ha kane ka jingïalang paidbah ka long kum u ksai bteng jong u Maheh HDR Lyngdoh bad namar kata, u la ong biang kumba phi ieid ïa u Maheh HDR phin ai lem ka jingieid ïa u ruh namar un ieid arshah ïa ki paidbah.
Nalor kata, u la ong ba don ki kyrtong kiba wan ïakhun ilekshon kim ju kren ban ieid jaidbynriew namar kim pat sngewskhem halade namar ki rieh ïalade ha ka lama. Kumno ki paidbah kin jied haba kim nud ban wan sha ki paidbah.
Shuh shuh u la ong ba ki don ki kyrtong kiba la byrngem ban wan hiar sha ki paidbah da ka bor pisa hashwa ka sngi thep vote, hynrei u la ong ba ki nong Sohïong ki la dep rai namar ki la ieid ïa u, ïa u Maheh HDR Lyngdoh, ïa ka seng UDP bad ïa ka jaidbynriew namar shisien ba la ieid ym lah ban theh da ka spah.
