Shillong, Jymmang 03:
Ka jingïalap ilekshon ha Sohïong ka la khluit bha hapdeng ki ar tylli ki seng saiñ pyrthei, kita ka United Democratic Party (UDP) bad ka National People’s Party (NPP), katba kiwei pat ki seng kum ka BJP, HSPDP bad TMC ki la kynjah jar ka rukom ïalap, bad ka Congress pat ka kham pynlut por ban rung ïing bad pynshai ïa ki nongrim jong u kyrtong.
Haba phai sha ka jingïalap ilekshon, ka NPP bad ka UDP kiba donlang ha ka Sorkar ki la ther bha ha ka rukom ïalap ilekshon bad ki nongkren ruh kim salia ban kynthoh markylliang.
Ha ka rukom ïalap ilekshon, uwei na ki nongkren ka UDP uba kham paw bha ha ki khubor u dei u Amazing Kurbah uba leit ban ïalap na ka bynta u kyrtong ka UDP u Bah Synshar Lyngdoh.
Kiba bun ki paidbah ha Sohïong ki la ong ba ha kane ka ilekshon, u Amazing Kurbah u la paw ha ka rukom ïalap ilekshon bad kiba bun ki nongring dur ki kham phai sha u haba u ai jingkren.
U kyrtong ka UDP u kham kynjah ha ka rukom kren lada ïanujor bad u Amazing uba ther ruh wat ïa ki nongïalam kiba kham hakhmat ka NPP kum u Bah Prestone Tynsong bad kiwei.
Ka rukom ïalap ilekshon ka long kaba ïakynthoh bad beiñ markylliang bad ka don ruh ka rynsan ïalap ilekshon ka UDP ha kaba u nongkren u pyndonkam lang da ka ktien sih haba batai shaphang ka jingkyrshan bad jingpyrta ki khyllung ban kyrshan ïa ka Bom (UDP).
Ki kyrtong jong ki lai tylli ki seng saiñ pyrthei kiba kynthup ïa ka BJP, TMC bad HSPDP ki kham kynjah ha ka rukom ïalap, katba ka Congress ka kham pynleit jingmut ban rung ïing ha ryngkat ka jingbatai ïa ki mat bad ki nongrim u kyrtong ka Congress u Bah S Osborne Kharjana.
Ki nongïalam ka NPP ruh ki la hiar sha Sohïong ban ïalap ilekshon bad na ka liang kiwei pat ki nongkren ilekshon ki kren ruh shaphang ki nongkyrshan bad ka MLA skhim kaba dei ban sam sha kiba dei ki nongkyrshan.
Ki kyrtong kiba ïakhun ilekshon ha Sohïong ki don hynriew ngut kiba kynthup ïa u kyrtong ka NPP, u Bah Samlin Malngiang, u kyrtong ka Congress u Bah S Osborne Kharjana, u Bah Sandondor Ryntathiang u kyrtong ka HSPDP, u Bah Seraph Eric Kharbuki u kyrtong ka BJP, bad u Bah Stodingstar Thabah u kyrtong ka All India Trinamool Congress (AITC).
