Shillong, Jymmang 03:
Ki ar ngut ki briew kiba dei shi kurim, ki la ngat ha shrip jong ki pulit ka Anti Narcotics Task Force (ANTF) halor ka jingdonkti ban pynïaid ïa ka kam khaïi drok ha nongbah Shillong.
Ïa kine ki shi kurim la ïoh ban kem noh da ki pulit na ka ïingsah jong ki, kaba don ha Demthring hadien ka jingphla jong uwei u nongkhaïi drok uba la shah kem noh ha ki pulit ha ka por mynstep na ka thaiñ Fire Brigade, Shillong.
La ong ba ki pulit hadien ka jingphla jong une uba la shah kem, ki la leit ban pynlong ka jingkhynra ïa katei ka ïing ha Demthring bad nalor ka jingïoh kem ïa kitei ki ar ngut shi kurim, la ïoh kurup ruh ïa u drok.
Na ka ïing jong kine ki shi kurim, ki pulit ki la ïoh ban kurup ïa 10 tylli ki synduk sabon ba la thep bha ïa u drok ba khia haduh 140.02 gram nalor ki kot ki sla kiba donkam.
Ha shwa ban leit khynra ïa ka ïing jong kitei ki shi kurim, ki pulit ka ANTF ki la leit ban khynra shwa ïa ka ïingsah jong u briew ba la shah kem ha ka por mynstep kaba don ha Demthring bad ki la ïoh ban kurup sa 10.78 gram nalor ka 68.08 gram ba ïoh kurup ha ka por ba u mut ban die sha uwei nongdih drok ha Fire Brigade.
Lah ban pynkynmaw ba ha ka step phyrngab jong ka sngi Balang, ki pulit Anti Narcotics Task Force (ANTF) ka East Khasi Hills, ki la ïoh ban kem ïa uwei u nongkhaïi drok na Fire Brigade, Laitumkhrah.
Ïa une u briew la kem ha ka por 5:30 mynstep katba u dang thmu ban aiti ïa u drok ha uwei u nongdih drok. Ki pulit haba pynlong ka jingtalasi ki la ïoh kurup ïa san tylli ki synduk sabon ba la thep drok heroin ba khia 68.08 gram, kawei ka scooty ML05-Q-1031, kawei ka mobile phone, ka driving licence bad kawei ka pla.
Halor kane ka jingjia ki pulit ki la pynrung ‘case’ ïa une u briew ha thanat Laitumkhrah hapoh ka kyndon NDPS Act bad ka jingtohkit mynta ka la ïaid shakhmat.
