Shillong, Jymmang 03:
Wat la ka UDP ka don lang ha ka sorkar synrop ba ïalam da ka NPP, hynrei u Myntri ka Sorkar Jylla, u Bah Paul Lyngdoh, u la ong ba wat la ki ïatreilang ha ka sorkar kam mut pat ban ïaleh pop lang, hynrei ka UDP ka don la ka jong ka nongrim.
Ïa kine ki kyntien u la kren ha ka jingïalang ïalap ilekshon u kyrtong ka UDP na Sohïong konstitwensi, Bah Synshar Lyngdoh ha Weilyngkut kaba la long ha ka Sngi Balang.
Ha kane ka sngi u Bah Paul u la pynshai ba ha ka ilekshon ba dang shu dep ki paidbah na rilum Garo ki la jied kham bun ïa ka seng NPP bad ki paidbah ha rilum Khasi Jaiñtia ki la jied kham bun ïa ka UDP, hynrei kine baroh ar tylli ki seng kim lah ban synshar marwei. Dei na kata ka daw ki hap ban ïatreilang.
Pynban u la bynrap biang ba lada ki ïatreilang kam mut ba kin hap ban ïa leh lang ïa ka pop, hynrei ka UDP ka don la ka jong ka nongrim.
Katba u Bah Titos Chyne uba dei u CEM ka KHADC bad President ka UDP East Khasi Hills District, u la ong ba mynta u snem ka la shongshit ka ilekshon ha Sohïong namar ha kiwei ki konstitwensi da pynlong jingïalang ha ka por mynsngi ym ju don briew, katba ha Sohïong ka madan ka dap beit smam.
“Nga kwah ban pynshai sha phi ki paidbah ba dei tang ka seng UDP kaba dei ka seng riewlum kaba dang skhem haduh mynta namar kiwei ki seng ki bun kiba la jah lut” u la ong.
U la ong biang ba ka donkam ban pynneh ïa ka seng riewlum khnang ban ïada ïa ka jinglong kyrpang ka jaidbynriew namar ki jaidbynriew riewlum ha Tripura na ka 36 lak ngut mynta ki sah satang 12 lak ngut, hynrei kim long trai shuh ha ka khyndew ka shyïap.
Na ka liang u Bah Kyrmen Shylla uba dei u Myntri ka Sorkar Jylla, u la ong ba ka UDP ka donkam bha ïa u kyrtong ba un jop na Sohïong konstitwensi khnang ban lah ban pynkhlaiñ ïa ka seng bad ban pynkhlaiñ ïa ka jaidbynriew.
