Shillong, Jymmang 03:
Ka Sustainable Transport and Efficient Mobility Society (STEMS), kaba la thaw da ka sorkar jylla ban wad ïa ki lad ki lynti kumno ban pynduna ïa ka jingkhapngiah ka sor, ka la pyntip ha ka Sngi Balang ba ka don jingthmu ban sdang noh ïa ki bos ban leit shaw bad leit on skul ïa ki khynnah kiba pule ha ki katto katne ki shlem kiba don ha Laitumkhrah.
Kane kan dei shwa tang ka jingpyrshang tang na ka bynta ki skul kiba don ha Dhankheti-Laitumkhrah bad hadien kata yn sa peit kumno ban pynïaid. Ïa mynta, kin don kumba 900 tylli ki jaka shong na ka bynta ki khynnah ha ki bos ba la pynkhreh da ka STEMS.
Ka Chief Executive Officer ka STEMS, ka Kong Isawanda Laloo, IAS, ka la pyntip ba ki la don 30 tylli ki bos ba la dep thied bad ba la pyndait da ki kor GPS, CCTV, kor ban tip shano ka bos ka leit, ka Mobile App ban peit lypa ïa ki jaka shong bad ban siew bad kiwei kiwei.
Ïa kine ki bos, ka Kong Isawanda ka la ong ba yn pynïaid da ki nongñiah bad ki nongïarap kiba la ïoh jinghikai bha bad ban pynthikna ba ki khynnah kin don hapdeng ka jingshngaiñ, yn buh ruh sa ïa ki briew ha man la kawei pa kawei ka bos.
Ka la ïathuh ba ka la dep don ka jingïakren la bunsien bad ki kmie ki kpa, ki skul, bad ki Rangbah Shnong bad ki tnat treikam jong ka sorkar ki la ïashim bynta bha ban pynïaid ïa kane ka projek.
Ka jingpynmih ïa kine ki bos ka long kum shi bynta ban pynduna ïa ka jingshaniah jong ki briew ha ki kali shimet namar kane ka dei kawei na ki daw jong ka jingjur ka dheng kali, la ong ka Kong Isawanda.
Na ka bynta ban ïoh pyndonkam ïa kitei ki bos, ka Kong Isawanda ka la ïathuh ba la pyntreikam ïa ka Mobile App ba la tip kum ka ‘STEMS Meghalaya’ bad ki kmie ki kpa ki lah ban shim ïa kane na Google Play Store ha kaba ki lah ban pynrung kyrteng ïa la ki khun. Hangne, la buh ruh ïa ki jingbatai kiba bniah ha kaba ïadei bad kitei ki bos skul.
Ka Kong Isawanda ka la ïathuh ruh ïa mynta, kin don 900 tylli ki jaka shong ha ki bos ba pynïaid da ka STEMS, bad ïa ka lynti ïaid yn sa pynbeit hadien ba la dep ka jingpynrung kyrteng.
