Shillong, Jymmang 04:
Ka Dr M Syiemlieh kaba dei ka Additional Medical Superintendent jong ka Ganesh Das Hospital ka la ong ba ka jingsahkut bad kdiah jong u thyrnia hapoh ka met jong ka longkmie kaba leit kha khyllung hapoh kane ka hospital ha ki sngi kiba dang shu dep, kam dei ka jingleh kaba torti lane ka jingleh khnang. Kum kine ki jingjia dkut jong u thyrnia ki ju jia, hynrei ka long pat kaba sngewsih ba ka la jia ryngkhat ïa katei ka longkmie.
Haba ïoh ban ïakren bad U Nongsaiñ Hima ha ka sngi Palei ka 4 tarik u Jymmang 2023, ka Dr Syiemlieh ka la ïathuh ba hadien ka jingsahkut jong utei u thynria hapoh ka longkmie, na ka liang katei ka jaka ai jingsumar wat la ki la pyrshang ban sei ïa utei u thyrnia napoh ka met jong katei ka longkmie hynrei kim lah satia namar bym don ïa ki tiar ki tar kiba biang. Kumta la pynkit noh ïa katei ka longkmie sha NEIGRIHMS Hospital kaba don ïa ki tiar ki tar kiba biang.
Kum ban shu pynkynmaw kawei ka longkmie ïa kaba la tip kyrteng kum ka Kong Paltima Rani kaba shong ba sah ha Mawlyndep ka la wan ban kha khyllung ha Ganesh Das Government Maternal And Child Health Hospital, Shillong ha ka 30 tarik u Ïaïong 2023 ha kaba katei ka longkmie ka la kha ïa i khyllung kynthei ha ka 1 tarik u Jymmang 2023. Hadien ba katei ka longkmie ka la dep ban kha ïa itei i khyllung bad ha ka por ba ki doktor ka Ganesh Das ki la suh ïa ka met jong katei ka longkmie, u thyrnia u la dkut kynsan bad sahkut shapoh ka met jong katei ka longkmie.
Na ka liang ki bor pynïaid ka Ganesh Das Hospital ki la pynkit noh ïa katei ka longkmie sha NEIGRIHMS Hospital ban ïoh sei ïa utei u lyngkhot thyrnia napoh ka met jong ka. Dei ha ka 2 tarik u Jymmang 2023 la lah ban sei ïa utei u thyrnia da ki doktor bad ki nos jong ka NEIGRIHMS Hospital.
Ha katei ka jingjia, kaba sngewsih ka long ba itei khyllung kynthei im don satia ha ka met ka phad kaba shait ba khlaiñ ha ka por ba la kha ïa i ha Ganesh Das Hospital. Kumta na ka liang ki bahaïing hasem jong katei ka longkmie ki la rah noh ïa itei i khyllung sha Nazareth Hospital namar ka jingbym don ïa ki ‘Ventilators’ hapoh Ganesh Das bad itei i khyllung i la khlad noh ha Nazareth Hospital Shillong ha ka miet jong ka 2 tarik u Jymmang 2023. Ha ka sngi kaba bud, kata ka 3 tarik u Jymmang 2023 la tep noh ïa itei i khyllung.
Nalor kata, na ka liang ka Dr. M Syiemlieh ka la ïathuh ba namar ba ka long kaba jynjar ban ïoh sei ïa utei u thyrnia uba sahkut shapoh ka met jong katei ka longkmie, na ka liang ki doktor ki la rah ïa katei ka longkmie shapoh Operation Theatre (OT). Na ka liang ka doktor ha OT ka la pyrshang ban sei ïa utei u thyrnia, hynrei ym lah ban sei bad namar ka jingbym don ïa ki tiar ki tar kiba biang, kumta la phah pynkit noh ïa katei ka longkmie sha NEIGRIHMS.
“Ban ong ïa ka jingleh torti ka long ka bym dei namar ka ju don hi ka jingdkut jong u thyrnia, hynrei kam ju jia barabor ka jingdkut. Ka shu long ba ka jia ryngkhat ïa ine i Kong bad ka long kaba sngewsih ba ha jaka ba ngin pyndep ïa ka jingsumar hangne, hynrei ngi hap ban phah noh sa shawei kaba long pynkulmar ïa ki bahaïing bahasem ruh. Ngi ruh ngi sngewsih hi, hynrei kane ka jingjia kam dei ka jingleh torti jong ngi lane ka jingleh khnang ka jong ngi namar lada ngi leh torti ruh ngi lah ban tap bad ban nym ïathuh ba u sahkut u thyrnia,” la ong ka Dr. M Syiemlieh.
Shuh shuh ka Dr. M Syiemlieh ka la ïathuh ba ka jingkhlad noh jong itei i khyllung ha Nazareth Hospital ka dei namar ba naduh ha ka por ba la kha ïa i, i la don lypa ha ka met ka phad ka bym shait bym khlaiñ kaba la pynlong ïa i ba in jynjar ha ka ban ring bad pynhiar mynsiem.
“Ka jingthmu jong ka hospital ka long da wan uno uno u nongpang uba duk ne uba riewspah, ngi dei ban ai jingsumar kajuh beit namar ngi dei ban ïaleh ban pynim ïa ki nongpang la ki dei ki khyllung ne ki longkmie,” la ong ka Dr. M Syiemlieh.
