Ka ilekshon jied MLA ha Sohïong konstitwensi kan long ka ban sah kynmaw namar ka jingdon jong ki katto katne ngut kiba nang ban kren paidbah. Na ka liang ka National People’s Party (NPP), uba kham tbit eh ban kren paidbah u dei u Symbud Myntri Rangbah, u Bah Prestone Tynsong. Shisien ba la kren u Bah Prestone, ki paidbah nongsngap ki shongshit beit ryngkat ka jingrkhie. Une u rangbah nongïalam u dei uba nang ban kren biria bad ban kren pynbitar ïa kiwei kiba pyrshah. Lada peit na ki nongkynthoh, ki don bun kiba kyrshan ïa u Bah Prestone bad ki bun ruh ki bym kyrshan bad kiba beiñ. Ha kawei pat ka liang, ka United Democratic Party (UDP) ka don ïa uwei na ki nongkren ba shyrkhei bad uta u dei u Bah Amazing Kurbah. Watla um dei satia u kyrtong ha kane ka ilekshon, hynrei u la kham pawnam pynban haba ïanujor bad u Bah Synshar Lyngdoh, u kyrtong ka UDP. Ka jingnang ban kren jong u Bah Amazing ka la pynlong ïa u ba un shah ïaroh bad shah beiñ ruh ha kajuh ka por.
Ngi lah ban don la ki jong ki jingsngew halor ka rukom kren paidbah jong kine ki arngut kiba shyrkhei ban padiah ïa u thylliej khlem shyieng. Ngi lah ban kyrshan bad ngi lah ban beiñ. Hooid, ha ka ilekshon donkam ban kren halor ki nongrim bad ki jingkular. Tangba ka ilekshon kan ym long kaba itynnad lada ym don ki nongkren kiba bit. Ngi shem ba ki paidbah ki ju smat ban sngap bha ïa ki jingkren jong u Bah Prestone bad u Bah Amazing. Ki shah beiñ ruh katta bad ki shah ïaroh ruh katta. Teng-teng ha ka jingshongshit, ki la kum lait sharud ha ka rukom kren. Ha ka ilekshon, ka mih beit ka jingïabeiñ ïa khoh para ba tbit ban kren. Hooid, ynda la palat than ruh ka sngewthait noh ban sngap, hynrei kata ka dei ka ilekshon. Hynrei ha ka ilekshon, lada ym don kiba nang ban kren paidbah, ka jingïakren ka blad noh bad ki paidbah kim da sngewtynnad khamtam sha nongkyndong. Ha sor ka kham pher namar kiba bun kim ju mih ban leit sngap jingïalang bad ki mih tang ha ka por ban leit thep ‘vote’. Ka ilekshon khlem da don kiba nang ban kren paidbah kam dei satia ka ilekshon!
Lada ngi peit sha ka ilekshon kaba dang ïaid mynta sha Karnataka, jan man la ka sngi ka mih ka jingïakynnoh ba markylliang hapdeng ki nongïalam bad ki kyrtong kiba ïakhun. Wat u Myntri Rangbahduh, u Narendra Modi, uba la pynlut por bad bor ban ïalap ilekshon, u khlem lait na ka jingkynthoh bad ka jingshah kynthoh. Ka Election Commission of India (ECI) ka ju pynkynmaw ïa ki seng saiñpyrthei ba kim dei satia ban kren pynshit ne ban kren pyrshah jaitbynriew. Tangba ngi ïohi ba ki don pat ki nongïalam seng saiñpyrthei ki bym pyrwa satia bad ki kren kat kaba wan lap ha ka shyntur. Baroh ki donkam ïa ki ‘vote’ ban jop namar ym don kiba ïakhun ilekshon ban shah rem. Ha kata ka jingkwah ‘vote’, ki jingkren ki long kiba huri-hura bad ki bym ai jingmyntoi eiei ïa ki nongsngap. Tangba ki nongsngap ki kham sngewtynnad lada don kiba nang ban ïa ai nia lane ban kynthoh biria lane ban kren ïa ki jingshisha ha ka dur jong ka pharshi.
Ngim lah ban len ba ha kane ka jylla jong ngi, ngi la duna shisha ki nongïalam kiba nang ban kren paidbah. Bun ki kren ïa ka bym sngewïahap haei-haei. Don ki bym nang hi ruh tang ban kren hynrei ki shah jied ban long MLA/MDC/MP. Ha ki snem kiba mynshwa pat, ngi la ïoh ïa ki nongïalam kiba shyrkhei shisha ban padiah thylliej, bad ym ju ngiah satia ban sngap ïa ki. Ki nang ban kren shisha lane kren biria ha kajuh ka por bad ki nongsngap ki ju sngewhun ban ïohsngew ïa ki. Watla kiba bun na kita kiba nang ban kren paidbah kim don shuh ha kane ka sla pyrthei, hynrei ngi kynmaw bad ngi pyrto ïa ka jingtbit jong ki. Ki nongshong shnong ha nongkyndong khamtam, ki kham ieid ïa ki briew kiba kiba nang ban kren paidbah. Ka saiñpyrthei ka kham shongshit ruh ha nongkyndong ban ha sor bad ki paidbah ha nongkyndong ki kham sngewthuh bha kaei ka ‘politik’.
Sa tang katto katne sngi, ki paidbah ka Sohïong konstitwensi kin sa ai ïa ka rai jong ki ïano kin phah sha ka Ïingdorbar Thawaiñ. Ïa ka jubab ngin sa tip ha ka 13 tarik Jymmang, 2023 ynda la ñiew ïa ki ‘vote’. Jia katba jia, long katba long, ngim lah khlem da kynthoh ba kane ka ilekshon ha Sohïong konstitwensi kan long ka ban sah kynmaw khamtam kito kiba smat ban sngap ïa ki jingkren paidbah jong u Bah Prestone bad u Bah Amazing. Kine ki arngut ki la lah shisha ban pynkhih win ïa ki nongwan sngap ïa ki jingïalang jong ki.
