Jowai, Naiwieng 05
U Myntri Rangbah ka jylla, u Conrad K Sangma ha ka 5 tarik Naiwieng u la buh ïa u mawnongrim ban tei ïa ka Ummulong Integrated Hospital ba 100 jingthiah ha Ummulong CHC, West Jaiñtia Hills, ha ka jingïadon lang u Symbud Myntri Rangbah Bah Sniawbhalang Dhar bad u Myntri ka tnad ka koit ka khiah Bah Wailadmiki Shylla.
Kane ka projek kan kot ha ka jinglut kaba T.53 klur bad ka ban ai ka jingshakri bad jingsumar ïa ki jait jingpang bapher bapher lyngba ki kor ki bor jong ka juk kaba mynta. Ka projek kan kynthup ruh ïa ka jaka sumar ba 25 jingthiah ka ban ai jingsumar na ka bynta kito kiba la ngop ha ki jingdih pynbuaid.
Haba kren ha ka jingïalang, u Myntri Rangbah u la ong ba ka koit ka khiah ka dang ïai long kawei na ki mat ba kongsan tam jong ka Sorkar, ha kaba haduh jan 9 percent na ka mang tyngka jong ka jylla la mang kyrpang sha kane ka tnad.
U la ban jur ruh ba tang ka jingpynlut pynsep kam lah ban pynbeit ïa ka jinglong janai ha ka jingshakri ha ka liang ka koit ka khiah, hynrei ka shong ruh ha ka jingdon ïa ki nongtrei kiba tbit, ki jingtei bad jingkyrshan kiba biang.
U Conrad u la ong ba ha kine ki phra snem ba la dep ka Sorkar ka la trei shitom ban weng ïa ka jingeh namar ka jingduna doktor bad ki nongtrei ka koit ka khiah, katba ki jingpyrshang ban pyndap ïa ki kam kiba dang thylli ki dang ïaid shakhmat.
U la ong ba ka jingtei ïa ki Medical College ha Shillong bad Tura kan ïarap ban pynkhlaiñ shuh shuh ïa ka kynhun ki nongtrei ka koit ka khiah ha ka jylla ha ki snem ki ban wan.
Haba kdew halor ka jingdonkam ban ïoh ïa ki lad jingsumar ha ka por kaba biang, khamtam ha ki thaiñ nongkyndong, u Conrad u la ong ba ki jingshakri ba kongsan ki dei ban long kiba lah ban ïoh hajan jong ki ïing ki sem jong ki briew, bad u la batai ba kane ka hospital ba la thmu ban tei ka long ka sienjam ba kongsan ban pynkhlaiñ ïa ki lad jingsumar ba kongsan hapoh ka thaiñ.
U la pyntip ruh ha ka jingïalang ba ka prokram jong kane ka sngi ka kynthup ïa 28 tylli ki prokram, kynthup ïa 7 tylli ki jingplie paidbah ïa ki projek, 16 tylli ki jingbuh mawnongrim bad kiwei pat ki prokram sam jingïarap bad pynkup burom, ha kaba baroh ki projek kiba la plie paidbah bad buh mawnongrim ha kane ka sngi ki kot haduh kumba T.200 klur.
U Conrad u la ai burom ïa u Myntri ka koit ka khiah Bah Wailadmiki Shylla uba la ai jingmut ban tei ïa kane ka hospital bad uba la trei shitom ban wad ïa ka jingkyrshan pisa.
U Bah Sniawbhalang ha ka jingkren u la kyntu ïa ki paidbah ban pyndonkam pura lyngba ki kam pynroi kiba la wanrah ha ka thaiñ, bad pynpaw ruh ïa ka jingangnud ban don ïa ka Nursing College bad kiwei pat ki jaka sumar khnang ban pynïoh ïa ka jingshakri kaba pura sha ki paidbah ka thaiñ.
U Bah Wailadmiki u la batai ïa kane ka hospital kaba thmu ban tei kum ka jingkyrkhu kaba khraw ïa ki nongshong shnong ka Ummulong bad ki shnong ba marjan jong ka.
