Shillong, Naiwieng 05
Ka Sorkar Jylla ha ka sngi Palei kala shong bishar ïa ka jinglong bala khreh ka Jylla ban pynlong ïa ka ilekshon MP shiteng samoi, hadien ba kane ka shuki ka la thylli noh bad ha kaba la pynleit jingmut ïa ki jingdonkam ha ki Polling Station.
Ïa kane ka jingïalang bishar kam la pynïaid da u Chief Secretary ka Jylla Shakil P. Ahammed.
Haba kren hadien ka jingïalang, u Chief Elec-toral Officer (CEO) Dr. BDR Tiwari u la ong, ki bor treikam jong ka Jylla kila long kiba la khreh bad shu ap sa tang ïa ka jingpynbna jong ka Election Commission of India (ECI).
“Katkum ki jingdonkam, ngi la long kiba la khreh ban pynlong ïa ka ilekshon shiteng samoi ha kano-kano ka por ba pynbna da ka ECI,” ong u CEO.
U ïathuh ba ïa ka jingïalang la pynlong na ka bynta ban pynthikna ba baroh ki jingdonkam kiba kongsan kin long kiba la biang lypa hashuwa ka sngi thep vote.
Ki tnad kiba khmih ïa ka umbam umdih, ka paiñkhana, ki miej ki shuki, ki ramp, ka pule puthi, ka rural development bad Power kila ïashimbynta ha ka jingïalang.
U Chief Secretary u la bthah ïa ki ban buh hakhmat eh ïa ki kam ba donkam ha ki polling station, kynthup ka jingpynpoi bording ilektrik ba shipor lyngba ka MePDCL.
Haba kylli lano ka ilekshon shiteng samoi kan long, u Dr. BDR Tiwari u la ong, “Kan shong ha ka ECI, kumta ngim lah ban kynthoh eiei. Ngi la dep pynkhreh lut nadong shadong. Ha kano-kano ka por ba ka ECI ka rai, ngin sa pynlong ïa ka”.
Haba batai ïa ka jingbuh por, u la ong ba kam don satia ka jingbuhpor ba thikna ba 30 lane 45 sngi.
“Shisien ba lait thylli ki shuki, ka ju long barabor ba dei ban pynlong ïa ka ilekshon hapoh ka hynriew bnai ba lait thylli ka shuki, hynrei lada don kino-kino ki jingeh bad kiwei-kiwei ki jingdonkam, ki lah ban shim kham slem,” u la ong.
