Shillong, Naiwieng 05
Ki nongshong shnong jong ka Riat Laban Dorbar Pyllun kim don eiei ban pyrshah ïa ka jingwan jong ka Shillong Ropeway Project, hynrei ka jingmih jong ki longkmie ban pynpaw ïa ka jingsngewkhia ka dei halor ka jingshah pynkhyllem ki dieng na ka jingsdang ban pyntrei ïa kane ka projek.
Ïa kane la kren da u MDC jong ka Laban Constituency u Bah Ricky Shullai haba kren sha ki nongthoh khubor ha ka sngi Palei.
U la pynpaw ba kum u nongmihkhmat paidbah u don ka jingsngewkhia kaba khraw haba ïadei ka jingmih jong ki kynrum kynram bad ka jingbym ïasngewthuh jingmut hapdeng ki longkmie, nongshong shnong bad ki Rangbah Shnong jong ka Riat Laban Dorbar Pyllun haba ïadei ka mat jong ka Projek Ropeway.
U la ong ba ka jingïatehkular jong ka Sorkar bad ka Dorbar Shnong ka dei ha u snem 2022, hynrei haba u la shah jied kum u nongmihkhmat ha KHADC ha u snem 2025, ki don kiba pynsngew ba ki kwah ban shai haba ïadei kane ka projek, “Ha ka sien shong dorbar ba nyngkong nga la buh jingkylli, la ka Riat Laban Dorbar Pyllun ka la ïoh jingbit ne em na u Syiem ka Hima Mylliem bad na ka KHADC” u la ong.
U la ong ba ha ka jingwad jingtip jong u ha kato ka por kam shym la don ka jingïasoi hapdeng ka Sorkar bad ka KHADC lane bad u Syiem ka Hima Mylliem, hynrei ka jingïasoi ka long beit tang hapdeng ka Sorkar bad ka Riat Laban Dorbar Pyllun bad kdew ruh ba ha kane ka jingïasoi kam shym la don ka jingthoh kaba kdew ba kan don ka jingpom ïa ki dieng.
Namar kata u la pynpaw ba ma u kum u nongmihkhmat u don ka jingsngewkhia bha haba ïadei kane, ym ba u pyrshah ïa ka projek hynrei ka jingsngewkhia ka long halor ki jingeh kiba lah ban mih na katei ka jingwan jong ka projek da kaba kdew ba ka jingshah pynjot ki dieng kaba la ktah ïa ka jingtyrkhong ka umbam umdih. U la ai ka jingïaroh ïa ka jingmih ki longkmie napoh ka Riat Laban Pyllun ban pynpaw ïa ka jingsngewkhia bad kiba don ka jingkitkhlieh ban sumar ïa ka Mei Mariang bad ïa ki tyllong umbam umdih.
Ban shai ki nongshong shnong u Bah Ricky u la pynshai ba ha u snem 1969, ka DC ophis ha kato ka por ka la aiti ïa ka ‘Memorandum’ sha ka Riat Laban Dorbar Pyllun ban ithuh ba kan dei kaba don bor ban peit ban sumar ïa ka khlaw kaba hap hapoh jong ka Raid.
Shuh-shuh u la ïathuh ba ha ka 01 tarik u Nailar 1981 ruh ka la don ka jingïasoi soskular bad u Chief Conservator of Forests ka Meghalaya ba ka Riat Laban Dorbar Pyllun kan dei ka nongpeit nongsumar ïa kane ka khlaw bad ban pynneh pynsah ïa ka khyndew ka shyiap. Ha kaba u la bynrap ba ka jingshimrai ka Riat Laban Dorbar Pyllun ïa kane ka projek ka dei hi ka bor ba la pynkup ha ka katkum ki kot ki sla.
“Ngam ong ba ka JAC ka bakla ne ngam ong ba wat kine ki Rangbah Shnong ki bakla, ngi kynmaw bad ki don ki jingthoh ruh ba ki dei kine ki Rangbah kiba la peit la khmih ïa ka eh ka shon jong ki nongshong shnong hapoh jong ka Riat Laban pyllun” la ong u Bah Ricky.
U la pynpaw ka jingsngewkhia sngewdiaw haba ïadei ka jingdon ka kynrum kynram bad ka jingbymdon ka jingïasngewthuh jingmut hapdeng ki Rangbah Shnong bad ka JAC, “ym lah ban kynnoh ba ki Rangbah Shnong ki bakla lane ka JAC ka biang, hynrei ïa kane ki jingeh donkam ban don ha kawei ka jingïakren ban ïasngewthuh jingmut” u la ong bad bynrap ba ki dei tang hapdeng shi ïing shi sem kum ki khun jong ka Riat Laban Dorbar Pyllun.
U la kyntu ïa ki Rangbah Shnong ka Riat Laban Dorbar Pyllun ba ki dei ban don ka bor ban pynshai bad ba ka JAC ruh ka dei ban don ka bor ban sngap ïa ka jingpynshai bad ban wan tang ha kawei ka jingïakren ban ïapynbeit pynbha ïa kane ka kam bad ban pynsngew tang da kawei ka sur sha ka Sorkar.
Ha kajuh ka por ruh u la kyntu ïa ka Riat Laban Dorbar Pyllun ban shimkhia ïa kane ka kam ban khot ha kawei ka jingïakren bad ba ka Sorkar ruh kan sngew kan sngap bad burom ïa ka rai ka ban mih na kata ka jingïalang bad ban pynbeit pynbha noh ïa kane ka kam bad ba kan poi ruh ha ka suk ka saiñ jong baroh ki liang.
