Shillong, Risaw 05
Ka Joint Action Committee kaba pyrshah ïa ka jingshna ïa ka Ropeway ka la leit ban jurip ïa ka wahduid kaba don ha syndah ka Ropeway ha kaba ka la lap ba kane ka wahduid ka la kylla kum ka jaka theh ñiut.
Haba ïakren bad u Bah J. Nongkynrih uba dei u dkhot ka Riat Laban Pyllun u la kyntu ïa ka Sorkar ba ka dei ban pyndam ïa ka projek shna Ropeway namar ha ka “Public Hearing” ki poi tang 22 ngut kiba wan ïashimbynta namar naduh ba la pom ïa ki dieng ka wahduid ka la tyrkhong.
U la ïathuh ba ha u bnai Ïaïong bad Jymmang kam pat ju rngad bad wat ha u bnai Kyllalyngkot wat ka kali ki pulit ka dang wan tong um hynrei naduh ba la pom ïa ki dieng ka la tyrkhong.
“Nga la wan peit ha kawei ka jaka kaba don ka jaka sah MES ha u 2024 ha u bnai Ïaïong ka um ka poi kumba 10 inshi ynda nga la leit mynshisngi ka um ka la don kumba ar inchi kaei ka ban jia ha u snem ban wan” u la ong.
Shuh shuh u la pynpaw ka jingsngewsih haba ki la pyntip ba ki la pom kumba 554 tynrai ki dieng hynrei ym tip pat ïoh ki la pom da ki hajar tylli.
Katba kawei ka longkmie ka la ong ba ka tnad Jngohkai pyrthei ka la pynshai ba kam ktah ïa ka tyllong um hynrei kam shym long kumta namar mar shu pynkhyllem ïa ki dieng ka um kaba tuid ka la rngad bad ka la kylla long ka jaka bret ñiut.
“Ngi kiba sah ha Madan Laban ngim ju duna um hynrei naduh ba ot ïa ki dieng mynta tang 12 kynta ngi ïoh um” ka la ong.
Ka la ong ba lada la shna ïa ka Ropeway yn shna ruh ïa ka jaka ïeng kali kaba rung palat 200 tylli ki scooty bad 100 tylli ki kali hangta, hangno yn ai um ïa kiba wankai bad kin sa wan knieh ïa ka bhah jong kiba sah ha Madan Laban.
