Shillong, Naiwieng 05
U Bah Paul Lyngdoh Myntri ba khmih ïa ka tnad kam jngohkai pyrthei ka Sorkar Jylla, u la kren shai ba ka Sorkar Jylla kan nym pynphai dien ne wengnoh ïa ka Shillong Peak Ropeway Project, ha kaba u la pyntip ïa ka jingïatehkular halor ka jaka (Land Lease), la dep ban pynskhem bad ki kynhun ba pyrshah ki la wan slem haduh saw snem mynta.
Haba kren sha ki lad pathai khubor ha ka sngi Palei jong ka taïew, hadien ba u la wanphai biang kum u Myntri ka tnad kam jngohkai, da kaba ong “Ka jingwan jong nga, ka long ban buh ïa ka jingshisha hakhmat u paidbah”.
“Ki jingkam kidei kiba lah beit ban leh, hynrei ngi don lut ïa baroh ki kot ki sla bad ngi” u la ong.
“Kaei ka jingpyrshah kaba hakhmat eh? Ki tyllong um. Nga la pyni ha phi ïa ka map. Tang kawei ka jingpyrshah kaba khraw tam ka long balei ba phi rung sha u Lum kyntang ka Lei Shyllong. Ngi la pyni shai ha phi ba ka jingjngai ba 3.5 km ka la pynïaphiah ïa ka jaka ban pyntrei ïa ka projek bad u Lum Shillong” ong u Bah Paul.
Haba pyni ïa ka map jong ka tnad PHE, u la ong ba ka lynti na Terminal-I kam don satia ka bynta kaba marjan bad ki tyllong um ne wahduid. Ka jingpynjulor ba marjan ki tyllong um, u ong, kadei na ki ïing ba shna da ki briew, ym ka Ropeway.
U Bah Paul u la ong ba ka Ropeway projek ka la mih na ka jingujor ba la ïaid da ki phew snem ha ka Shillong View Point- ID check, jingpyrkhing ban rung bad ka jingkhang ïa ki khyrdop. Ka projek ka tyrwa ïa ka jingleit ba tang 3 minit na Terminal-1 sha ka Viewpoint na ka bynta baroh ki nongleit kai.
Halor ki kot ki sla, u la ong, ki la biang pura. Ka jingbit na ka Dorbar da ka jingthoh ha u 2022, ka jingaiwai ba 30 snem ïa ka jaka bad ka Raid Laban Dorbar Pyllun jong ki 7 shnong ha ka 16 tarik Kyllalyngkot, 2023, ka NOC na ka AAI, Air Force bad ki shipai, ki jingbit na ki Ministry ka Sorkar India, ka jingai ïa ki jaka ban thung ïa ki dieng ha u Nailur 2023.
U Bah Paul u la kdew ruh ba ki jingpyrshah ki la mih pyrthei dang ha u snem ba la lah.
“Kane kadei ka jingïateh hapdeng arliang mamla. Kam don satia kano-kano ka por ban sangeh noh ne pyrkhat biang ïa ka rai. Naduh ka sngi ba soi ïa ka MoU, la ïashon muhor, ïasoi bad buhkhop ïa ka” ong u Bah Paul Lyngdoh.
U la ong ba ka Sorkar ka la ïakren bunsien bad kiba pyrshah, kynthup ka jingïalang ha ka sngi Balang, hynrei ki kynhun ba pyrshah kim shym la lah ban pynshai ïa ki daw jong ki. “Ka ktien kaba ki pyndonkam ka long tang ‘Ngi pyrshah, ‘ngi ïeng pyrshah,” u la ong
U Bah Paul u la ong ba ka President jong ka Ri India ka la plie ïa kane ka projek hadien ka jingbishar bniah kaba la pynlong da ka Rashtrapati Bhavan bad wat ki bor shipai, kiba lah ban pynpaw ïa kino-kino ki jingsngewkhia halor ka jingshngaiñ jong ka ri ruh, ki la ai jingmynjur ïa ka projek.
U Bah Paul u la pynthikna ruh ba ka projek kan ïaid beit shakhmat. “Nga kyntu ïa ka JAC ba kam dei ban shu ïaïam ïa lynïar hynrei kadei ban wan shakhmat ban ïakren,” u la bynrap.
U la kdew ïa ka jingpynbna jong ka Union Environment Ministry ha ka 27 tarik Ïaïong 2022, kaba la pynshai ba ki Ropeway kidei ki lad ha ka leit-wan kiba ïada ïa ka mariang bad la ai jingmut ban weng ïa ki na ka EIA Notification, 2006.
