Sydney:
Kum shi bynta ban rakhe ia ka jingpdiang burom ia u Charles kum u syiem bathymmai jong ka UK, ka sorkar Australia ka la ai sngewbha sha une u syiem thymmai haduh $10K. Kane ka jingai sngewbha ka don ruh bad kawei ka khubor bad kane ka long ban ai jingmut ia u Charles ba un shim khia ban ai jingiada ia ki tuta kiba don ha kane ka ri kiba la sdang ban duhjait.
La ong ba ka Australia ka dei ruh kawei na ki ri ha ka pyrthei kaba la pynpaw ia ka jingsngewkmen halor ka jingkiew khet u Charles bad rai ban rakhe lem ia ka jingkiew khet jong u lem bad ki nongshong shnong ka UK.
Ka sorkar Australia ka la ai sngewbha da ka pisa kaba haduh $10,000 sha u Charles kum shi bynta ba un shim khia ban ai jing iada ia ki Western Ground Parrot (WGP), aka Kyloring’ kiba la sdang ban duhjait bad kiba la kham ñiar ban iohi ne shem ha UK.
Ka Western Ground Parrot (WGP), ki dei ki tuta kiba ngin ym lah ban shem ha kiwei kiwei ki ri ka pyrthei ha kaba kine ki tuta ha ki por ba la leit ki kham bun bha ha UK.
Hynrei na ka jingbym shim khia ka sorkar UK ban leh eiei ha kaba iadei bad ka jingai jingiada ia kitei ki tuta mynta ki la sdang duna bha.
Naduh u 2010 la lap ba don satang kumba 150 tylli ki Western Ground Parrot bad u Anthony Albanese, uba dei u Myntri Rangbah ka Australia kum shi bynta ban rakhe ia ka jingkiew khet u Charles kum u Syiem thymmai ka UK ula noh synñiang da katei ka pisa khnang ba u Charles un lah ban leh eiei bad kumjuh ruh ban shim khia ban ai jingiada ia kitei ki tuta.
Shuh shuh ia ki Western Ground Parrot lah ruh ban lap ha ka Cape Arid National Park bad Nuytsland Nature Reserve jong ka Western Australia bad ha kane ka ri ruh la shim khia ban ai jingiada ia kitei ki tuta namar ba ki long kiba kham pher.
