Nongpoh, Jymmang 05:
Ka ïing jong u Rangbah Shnong ka Nongagang Marngar, u Bah O Binong, ka la ing khong khait ha ka miet jong ka Sngi Palei kaba la wanrah ïa ka jingduhnong kaba khraw ïa ka katei ka longïing naba ki jingdon jingem baroh ba kynthup naduh u kba, ki tiar thir ksai, ki kot ki sla donkam lem bad kiwei kiwei ki la duh lut.
Kumba la ïoh jingtip, la ïathuh ba katei ka jingjia, ka la ka jia ha ka por kumba 10 baje eiei mynmiet katba ki dang leit ban shong pynshngaiñ sha ka ïing jong ka samla Walinda Binong (Bam kwai ha dwar U Blei) kaba don marjan bad ruh kiba dang ïadei shi ïing shi sem.
La ïoh jingtip ruh ba ka daw jong ka jingkem ding katei ka ïing ka long namar ha ka por ba ki mih ban leit shong pynshngaiñ sha katei ïing ïap briew, ki la kum klet ban pynlip ïa u mombati. La ïathuh ba ki para marjan tang mar ïa ïohi ïa katei ka jingjia, ki la mih ryntih ban ïakhun pynlip ïa katei ka ding kaba la klang bad sdang bam duh ïa ka ïing.
Haba ïoh ban ïakren bad u Bah O Binong, u la pynpaw ïa ka jingsngewsih kthang halor katei ka jingjia kaba kim shym la poi pyrkhat satia. U la ïathuh ruh ba hashwa ba kin mih na la ïing ban leit shong pynshngaiñ sha katei ka ïing ïap briew, ka la don ka jingpynlip ïa ka bording ilektrik (load shedding) bad namar ba ki dang hap treikam, kumta ki la shu pynmeh noh da u mombati.
Shuh shuh u Bah Binong u la ïathuh ba tang mar ïa dep kam, hapdeng ka jingkyrkieh ban leit shong pynshngaiñ sha katei ka ïing ïap briew, la kum klet noh ban pynlip ïa u mombati. U la ïathuh ba ka jingduh na ka jingbam duh jong ka ding, kam duna shuh ïa ka T. 5 lak.
Halor kane ka jingjia, na ka liang u Bah Binong kum u kpa jong ka ïing, bad kiba dei na ka longïing ba duna ha ka ïoh ka kot, u la buh ka jingkyrpad sha ki bor sorkar bad ruh sha u MLA ka Nongpoh ban pynïoh lem ïa ki lad jingïarap khnang ba kum ka ïing kan lah biang ban ïeng sa shisien pat.
