Shillong, Jymmang 05:
Hadien ka jingmih khubor kiba shu antad bad ki khubor kiba la ïoh jingtip tikna ha kine ki khyndiat sngi bad taïew, ka General Council (GC) jong ka People’s Democratic Front (PDF) ha ka sngi Thohdieng da kawei ka sur ka la pynurlong ïa ka jingangnud ban leit ïalong kawei bad ka National People’s Party (NPP), ha kaba yn pdiang burom ïa ki 2 ngut ki MLA ka PDF lem bad ïa ki nongkitkam kane ka seng ha ka janmiet sngi Saitjaiñ.
Lyngba ka rai ka General Council ban leit ïalong kawei ka PDF bad ka NPP, ka PDF ka la wai noh kum ka seng saiñ pyrthei ha Meghalaya, katba ka NPP kaba don 26 ngut ki MLA, mynta kan kiew ha ka jingdon ki MLA jong ka sha ka 28 ngut.
Ïa ka General Council ka PDF la pynlong ha Shillong Club ha kaba la wan ban ïashimbynta lang da ki nongkitkam kane ka seng na kylleng ki konstitwensi ha ka jingdonlang ki ar ngut ki MLA, u Bah Gavin Miguel Mylliem (MLA ka Sohra) uba dei u President ka PDF, bad u Bah Banteidor Lyngdoh u MLA ka Mawkynrew konstitwensi.
Haba kren sha ki lad pathai khubor, u Bah Gavin u la ïathuh ba ka seng ka la rai ban ïaid shakhmat ha kaba ïadei bad ka jingthmu ban ïalong kawei noh bad ka NPP.
U la ong ba hashwa ban poi sha ka rai kaba la shim da ka General Council, ka PDF ka la rah shwa ïa kane ka mat hakhmat ka CEC ha kaba la ïatai ïathir bad kiba bun ki la kham noh sha ka NPP.
U la ong ba ka jingkhot na ki seng saiñ pyrthei ka la don hadien ka ilekshon, hynrei ka PDF ka sngewdei ban ïatai shwa ha ka CEC hashwa ban shim ïa ka rai.
U Bah Gavin u la ong ruh ba kam don ka jingpyrkhat kaba myntoi shimet, hynrei ka dei ka mat kaba la wanrah haba shai haba shit ha ka jingïadonlang jong baroh ki dkhot ka seng.
U la ong ba lada ka dei tang na ka bynta ka jingmyntoi jong ki 2 ngut ki MLA, lehse kan nym don ka jingïatai hapoh ka seng.
Halor ka jingjied ka General Council ban leit ïalong kawei bad ka NPP, une u President ka PDF u la ong ba kum ka seng kaba la dep don lypa bad ïatreilang bad ka NPP ha ka Sorkar MDA-I, ki nongkitkam ka seng ki la pynpaw ba ka kham suk ban leit sha kane ka seng namar ki nongrim jong ka NPP bad ka PDF ki long kumjuh.
