Shillong, Jymmang 05:
U kyrtong ka Congress na Sohïong konstitwensi, Bah S. Osborne Kharjana, u la ther tyngeh ba dei ka seng UDP kaba shet kylla haduh bym ïoh shuh da u Khasi ban long kum u Myntri Rangbah ka jylla kumba la angnud ki paidbah ka jylla.
Ïa kane u la pynpaw haba ai jingkren ha ka jingïalang ïalap ilekshon mynta ka sngi ha ïew Sohïong ban pan jingkyrshan na ki paidbah ynda kin leit thep ïa ka vote ha ka 10 tarik mynta u bnai. Ha kane ka sngi la ïadonlang u President ka MPCC, Bah Vincent Pala bad u MLA ka Mawhati, Bah Charles Marngar.
Nangta, u la ong ba ki paidbah ki la shaniah ha ki seng riewlum kiba kam ba ieid jaidbynriew, hynrei hadien ka jingñiew ïa ka vote ki la die lilam ïalade sha ka seng BJP, khamtam ka UDP kaba ki paidbah ki la ap khmih lynti, hynrei kane ka seng ka la leit ïatreilang bad ka NPP.
U la ong biang ba ka ilekshon ha Sohïong ka jingïakhun ka long beit hapdeng ka Congress pyrshah ïa ka seng BJP namar ka UDP, NPP, HSPDP ki la leit ïasoh bad ka BJP ha kane ka sorkar kaba la ïalam da u Conrad Sangma.
“Nga kyrpad ïa ki nongthep vote ba kin pyrkhat ïa ka ri bad ka jaidbynriew namar ka shi vote jong phi ka pyllait im ïa ka jaidbynriew” u la ong.
Nalor kata, u la ong ba ki paidbah ha Sohïong konstitwensi ki donbok palat ban thep vote marwei namar ki seng riewlum kiba ieid jaidbynriew hadien ba la ñiew vote ki la die ïalade sha ka BJP.
Shuh shuh u la ong biang ba ka jaidbynriew ki la angnud ban ïoh long Myntri Rangbah ka jylla da u Khasi bad ka dei ban bat da ka seng UDP, hynrei jia aïu ki MLA ka HSPDP kiba thmu ban leit kyrshan ïa ka NPP ki la shah thang tyngshop. Ynda ki la mut wanphai, u President ka UDP, Bah Metbah Lyngdoh u la leit sop-sop bad u Conrad Sangma ban thaw ïa ka sorkar MDA-2.
Kumta u la ong biang shaei ka jaidbynriew kan leit haba ki paidbah ki jied ïa ki MLA ki bym lait kren. Dei na kata daw ïa ka kam Myntri Rangbah la hap ban shimti noh da ki jaidbynriew Garo.
