Shillong, Jymmang 05:
U Bah Vincent H Pala, MP ka Lok Sabha na Shillong bad President ka Meghalaya Pradesh Congress Committee u la ther tyngeh ïa ka sorkar ba la synshar da ka BJP ha Manipur namar bun tylli ki ïingmane ki la shah thang ha kine ki sngi ba la don ka jingïakynad ha ka jylla Manipur.
Ïa katei, u Bah Vincent u la kren ha ka jingïalang ïalap ilekshon na ka bynta u kyrtong ka Congress, u Bah S. Osborne Kharjana kaba la long ha ïew Sohïong ha ka Sngi Thohdieng. U Bah Vincent u la hap ban kren nyngkong ha kane ka jingïalang namar u la hap ban wanphai sha Shillong ban ïashim bynta ha ka jingïalang ban ïakren halor ka jingshah thang ki ïingmane ha Manipur.
U Bah Vincent u la ong ruh ba ka don jingma hapoh ka jylla Meghalaya na ka jingsynshar ka sorkar MDA kaba don lang bad ka seng BJP.
Na ka liang u MLA bad MDC ka Congress na Mawhati konstitwensi, u Bah Charles Marngar, u la kynnoh ba dei u Bah Samlin Malngiang bad u Bah Synshar Lyngdoh kiba la pynliem ïa u (L) Bah HDR Lyngdoh ha u snem 2018 ha ka por ba u la ïakhun na ka seng Congress.
U Bah Charles u la ong ba dei ha ka por u Bah HDR u la jop na ka Congress uba la wanrah ïa ki kam pynroi hapoh Sohïong konstitwensi bad u kyrmen ba ki paidbah kin jied ïa ka seng Congress ha kane ka ilekshon.
U Bah Charles u la ïathuh ba ha ka ilekshon ba la dep, u kyrtong ka NPP ha Mawhati konstitwensi u la kit briew palat 20,000 ngut haduh bym lait shuh ban ïaid ki briew. Hynrei ynda la ñiew ka ‘vote’, u kyrtong ka NPP u la ïoh tang 7,000 ‘vote’ bad ma u kum u kyrtong Congress u bym ju pynlong jingïalang paidbah, u la ïoh haduh 13,000 ‘vote’.
U la pynpaw ka jingkyrmen ba ki paidbah ha Sohïong kin sa pynlyngngoh ha kane ka ilekshon namar u kyrtong ka Congress um ju pynlong jingïalang paidbah, hynrei ki shu rung ïing ban pan jingkyrshan na ki paidbah.
Ha kajuh ka por u Bah Charles u la ong lada jop ilekshon da ka jingjied, sngewbang ban shakri ïa ki paidbah bad ïa ka jaitbynriew.
