Shillong, Jymmang 05:
Ki ar tylli jaitbynriew kiba na Manipur – Meitei bad Kuki ki la ïalum lang ha ka jingïakynduh ha ka sngi Thohdieng kaba la khot da u DGP ka Meghalaya, Dr LR Bishnoi ha ryngkat ki pulit ophisar ka East Khasi Hills district ha kaba la kular bad shimlang ïa ka rai ban pynneh ïa ka suk ka saiñ bad ban nym mih kano kano ka jingïakynad namar ka jinglong jingman ha Manipur.
Ïa kane ka jingïalang la pynlong ha Naga Community Hall hajan Nagaland House ha kane ka nongbah.
Haba kren sha ki lad pathai khubor, na ka liang u DGP ka Meghalaya, Dr Bishnoi, u la ong ba la ïakren da ka jingsngewkhia halor ka jingjia ha Manipur kaba lah ban wanrah kano kano ka jingbym shaniah para jaitbynriew bad la rai lang ban shim ki lad kiba lah ban ïakhun bad jop ïa kano kano ka jingsngew bad jingbym shaniah.
U DGP u la ong ba baroh la mynjur lang ban pynneh ïa ka suk ka saiñ bad ka jingïadei bad jingïajan hapdeng ki ar jaitbynriew kiba dei na Manipur.
U la ong ba kiba la shah rah ha ki pulit ha ka miet sngi Palei namar ka jingïakynad kaba malu-mala, la ïoh ban pynsngewthuh bad sneng da kiba la heh ka san kiba dei na baroh ar tylli ki jaitbynriew bad kita kiba la donbynta ban ïakynad ruh ki la kubur ba ka dei kaba bakla ban leh kumta da kaba kular ruh ba kan nym jia shuh.
Haba kylli la yn weng noh ïa ka ‘case’ ïa kiba shah rah ha ki pulit ha Shillong, u DGP u la ong ba ban poi shaduh u pud ban rai pynrem ïa kiba shah rah, kan nym jia satia bad kito kiba shah rah ha ki pulit ki la kular ruh ba kan nym jia shuh bad kum babe ïa kaba la jia.
U DGP u la ong ruh ba ki pulit kin pahara ha nongbah Shillong khamtam ha ki jaka ba shong ba sah ki jaitbynriew Manipuri ban tehlakam ïa kino kino ki jingïakynad, bad la mana ruh ïa ki jaitbynriew Manipuri ba kim dei ban shim ïa ka aiñ ha la ki jong ki kti, bad lada ki donkam jingïarap, ki dei ban pyntip sha ki bor pulit.
U la ong ba ki don ruh kumba 6 tylli ki jaka kiba donkam ban kham peitngor ha nongbah Shillong.
Na ka liang u Adviser ka Agriculture and Allied Sector, NEC Shillong, u M. Iboyaima Meitei, uba dei ruh u ’riew rangbah na Manipur, u la ong namar ka jingjia kaba jia ha Manipur ka don ruh ka jingjia kaba malu-mala ha nongbah Shillong ha ka miet sngi Palei. Dei na kane ka daw ba u DGP Meghalaya u la lum ïa ka jingïalang bad ki briew kiba kham hakhmat na ka jaitbynriew Meitei bad Kuki ban ïakren bad ban tehlakam ïa kino kino ki jingjia kiba lah ban pynmih ïa ka huri hura.
U la ong ba hapdeng ka jingïadonlang ki ’riew rangbah bad samla na baroh ar jaitbynriew lem bad ki pulit ophisar, la kular ban shimkhia lang ban tehsong ïa ka jingïajan bad ïadei parabriew bad para Jylla na Manipur.
U la ong ruh ba kaei kaba jia ha Manipur ka dei kaba sngewsih haduh katta katta, bad ka shong ha ki bor bahalor ka Sorkar Manipur kumno ban tem ïa kane.
La don ka jingsngap jar shi minit ban sngewlem ïa kaei kba ïadei bad ka jingjia ha Manipur khamtam ka jingduh ïa ki mynsiem briew.
ka jingïalang la ïohi ïa ka jingkhublei kti lang para maki bad shondur lang lem bad ki pulit nalor ka jingshisha lang.
