Shillong, Jymmang 05:
Ka Khasi Jaiñtia Presbyterian Assembly ha ka Sngi Thohdieng ka la pynpaw ïa ka jingsngewsih halor ki jingjia ha jylla Manipur ha kaba kumba 24 tylli ki ïingmane ki la shah pynjulor kynthup ïa kiba bun ki skul bad kiwei ki jingtei.
Ha u kyrwoh khubor, u Rev. SR Dkhar, Senior Administrative Secretary ka KJP Assembly, u la ong ba kane ka la wanrah ïa ka jingïaumsnam bad la don ruh ka jingduh ei ki mynsiem bakordor. U Rev. Dkhar u la ong ba kane ka jingsngewpher hapdeng ki paid nongshong ka lah ban ktah ïa ka thaiñ Shatei Lam Mihngi baroh kawei lada ym lah ban teh lakam ïa ka. U la ong ba ka jingïakhih ban ïoh ïa ka hok ka dei ban long da ka lynti kaba dei.
Shuh shuh ka KJP Assembly ka la kyrpad ïa ki Myntri Rangbah ka jylla Manipur, Mizoram, Assam bad Meghalaya ba kin ïatreilang ban ïoh wanrah ïa ka jingshongsuk. Ha kajuh ka por, u Rev. Dkhar u la ong ba ka seng saiñ hima kaba synshar ha Manipur ka dei ban kiar na ka jingïashah liang khnang ban ïada ïa ki rit paid kiba long ki Khristan ha Manipur.
U la ong ruh ba ka jingduwai ka long na ka bynta kito kiba la ngat ha ka shitom bad jingduh ïa ki jingdon jingem bad ïa ki baieid bathoiñ ba u Blei un kyrshan bad ïarap ïa ki ha kaba kum kane ka por ba sngewsih.
