Shillong, Jymmang 05:
Katba u nongbishar ka Meghalaya High Court u dang ai hukum ha kaba ïadei bad kawei ka mukotduma halor ka jingpynlip bording ba khah-khah, ka la don ka jingthut ba hapdeng khyndiat por ha ka bording bad kane ka la pynlong ïa u nongbishar ban kdew ba ka lah ban dei ka dak ka shin ba ka sorkar jylla kan hap ban ai ïa ka jubab ba pura halor ka jingthut ka bording.
Uwei u nongshong shnong ba la tip kyrteng kum u Flaming B. Marak, u la leit ujor da ka mukotduma sha High Court halor ka jingpynlip bording ba khah-khah ha ka jylla.
Na ka liang u muktiar jong u Chairman ka Meghalaya Energy Corporation Limited u la pynpaw ba ka jingdonkam bording kaba man la u bnai ha ka jylla ka long kumba 200 Million Unit katba ka jingdon bording pat ka long tang 88 Million Unit.
Sa uwei pat u muktiar uba la mihkhmat ïa kawei pat ka liang u la kdew ba ka jingduna bording ka dei namar ka jingthut ha kawei na ki shlem pynmih bording kaba don ha Tripura bad ka sorkar Meghalaya kam don lad ban thied bording na kiwei pat ki tyllong.
Ka High Court ka la ong ba ka dei ka kamram jong ka sorkar jylla ban pynthikna ba ka bording ka don katkum ka jingdawa bad dei ban pynkhreh ïa ki saiñdur khnang ba yn lah ban pyndap ïa ka jingdonkam bording hadien habud.
Ka la ong ruh ba ka sorkar ka lah ban thied bording na ka ‘Open Grid’ bad ban poi sha ka jingïasngewthuh jingmut bad ki kompani pynmih bording ban pyntikna ba ka bording kan don na ka bynta ki paidbah lada ki paidbah ki kloi ban siew.
Ka High Court ka la bthah ïa ka sorkar jylla bad ïa ka MeECL ba kin ai jingthoh sha ka bad ban pyni kiei ki lad ki lynti kiba mynta bad kiba hadien kiba don bad ban kheiñ antad katno ka jingdonkam bording bad ha kajuh ka por ban pyni kaei ba kin leh lada don jingthut ha ki shlem pynmih bording bad kiei kiwei pat ki tyllong bording ba lah ban pynbiang ïa ka jingdonkam.
Shuh shuh ka ïingbishar ka la kdew ba ha ki jingthoh, dei ban pyni ba ki kynta pynlip bording ki dei ban long mar katjuh bad kiei ki jingpynkhreh ban pynbiang bording na ka bynta ki shlem kiba donkam kum ki Hospital, Airport bad kiwei.
