Nongpoh, Jymmang 05:
Da ki spah ngut ki paidbah ki la tuid sha ka phyllaw jong ka Nongpoh Town Shopping Complex ha Nongpoh ha ka Sngi Thohdieng kum shi bynta na ka jingthang mombati ban pynpaw ïa ka jingsngewlem halor ka jingkhlad ba syndet jong ka samla Walinda Binong ha ka 27 tarik Ïaïong hapoh ka jaka sah ka jong ka ha skulbah Mody University kaba don ha ka jylla Rajasthan.
Ïa kane ka jingthang mombati ban kynmaw ïa katei ka samla pule, la pynlong da ka Dorbar Shnong Nongagang ryngkat bad ki samla shnong ha kaba la wan ban ïashim bynta ruh da ki seng ba kynthup ïa ka Nongpoh Area Women Welfare Association (NAWWA), ka Hynñiewtrep National Youth Front (HNYF) Northern Region, ka kynhun ki nongthoh khubor ka Ri Bhoi lem bad ki riew paidbah.
Haba kren ha kane ka sngi, ki nongïalam ba kynthup ïa ka Kong Meristella Lamare, President ka NAWWA, u Bah Marcus Marten, President ka HNYF NR lem bad u Bah Cornelius Laloo ki la pynpaw ïa ka jingsngewsih bad sngewkhia halor ka jingkhlad ba kyndit jong ka samla Walinda Binong.
Ki la pynpaw ruh ïa ka jingsngewlem sha ki bahaïing hasem jong katei ka samla ba kin ïoh ïa ka jingpyntngen mynsiem na u Blei nongbuh nongthaw kiba mad ïa kane ka apot sepsngi.
Na ka liang kitei ki nongïalam kiba la ïakynduh bad ïakren ruh bad u kpa katei ka samla bad ki bahaïing hasem, ki la pynpaw ba na ka liang ka jong ki ruh kim sngewïahap satia halor ka jingkam jong ka Mody University ba katei ka samla kan shim ïa la ka jingim, hynrei ba ka sorkar jylla bad ka sorkar Rajasthan ki dei ban shimkhia ban pynlong ïa ka jingtohkit kaba khuid ba suba khnang ba ki bahaïing hasem kin ïoh ïa ka jingbishar kaba hok.
Hashwa jong katei ka jingïalang thang mombati, la pynlong ruh ïa ka jingduwai ba kyrpang na ka bynta ka mynsiem jong ka samla Walinda ba kan ïoh ïa ka jingjahthait kaba shi junom.
