Shillong, Jymmang 05:
Kumba 67 ngut ki samla pule kiba dei na Meghalaya ki la poi ha Guwahati na nongbah Imphal da ka liengsuiñ kaba la pynbeit da ka Sorkar Jylla.
Haba ïakren bad ka Myntri Sorkar ka Kong Ampareen Lyngdoh ka la ïathuh ba ki don 67 ngut ki samla pule ka Jylla kiba la wan phai na Imphal da ka liengsuiñ sha Guwahati.
La pdiang ïa kine kiba wan phai ha Guwahati da ka kynhun kaba la phah kyrpang da ka Sorkar Jylla ban peit ïa ka jingbit jingbiang jong kito kiba wan phai sha la ka jong ka Jylla.
Kine kiba wan phai na Imphal ki kynthup lang ruh ïa ki nongïalehkai phutbol ka Shillong Lajong FC.
Ha kawei pat ka liang, ka Sorkar Jylla ka la pynbeit da ki bos ban kit ïa kine kiba wan phai na Imphal kiba kynthup kawei ka bos kaba leit sha Rilum Garo bad 3 tylli ki bos kiba leit sha Rilum Khasi Jaiñtia.
Na ka liang u Myntri Rangbah u Conrad K Sangma u la dep pynbna ba ka Sorkar ka la pynkhreh ban phah wan phai ïa ki nongshong shnong ka Jylla kiba sahkut ha Imphal khamtam ha ki jaka pule bad la shim ki lad ki lynti ban pyntikna ba ki lait na ka jingma namar ka jingïakynad bad ka jinglong jingman kaba syier ha Manipur.
Ka Sorkar Jylla ka la ïathuh ba ki briew ka Jylla kiba sahkut ha Manipur ki kynthup ïa 50 ngut ki samla pule kiba dei na ka Agriculture University, 10 ngut na ka Food Technology Institute, 25 ngut ki dkhot bad nongïaleh ka Shillong Lajong nalor kiwei kiwei.
Ka Sorkar Jylla da kaba sngewthuh lang bad ka PMO, Ministry of Home Affairs, DG Assam Rifles, Ministry of Civil Aviation bad ki nongpynïaid liengsuiñ shimet, ka la shim ki lad ban ai jingshngaiñ ïa kiba wan da ka liengsuiñ na Imphal.
