Mumbai:
Hadien jong ka Alia bad Priyanka, ka khubor ba la ioh ka iathuh ba ka Anushka Sharma ruh kan sa leit shim bynta lang ha ka Cannes Film Festival ka ban long ha France. Kane ka puron ha kane ka jingleit sha Cannes kan sa iasam lang ia ka rynsan bad ka Kate Winslet, la iathuh ka kaiphod. Kane ka jingleit ka Anushka sha Cannes kan long ruh kum shi bynta ban ai burom ia ki kynthei kiba don bynta bad ka Cinema.
Ka Anushka kaba dei ruh ka nongrah ktien jong kawei na ki kompani pynmih jingtah pynbha briew ha ka sien nyngkong kan sa ioh ban shim bynta sha Cannes kumba long ka Alia.
Kane ka puron ba paw ka Bollywood ha ryngkat ka Kate kin sa iohlad ban pynpaw ia ka jingtrei shitom jong ki kynthei kiba don bynta bad ka Cinema bad nalor kane kan sa ioh ruh ban iakren halor shibun kiei kiei kiba iadei bad ki kynthei.
Ka Anushka kaba la ak ha ki Blockbuster Film kum ka Sultan, PK bad Sanju kan sa kren ruh halor ki phlim Bollywood ba la lam khmat da ki kynthei bad kumno ba mynta ki kynthei ha kane ka karkhana kila sdang kham kiew bad ioh ruh ka ban shim ia ki bynta ba kongsan ha ki phlim.
Kane ka puron kaba long ruh ka nongpynmih phlim bad kaba la ai mynsiem ia kiba bun ki kynthei lyngba ki phlim ba ka ak bad shim bynta ka sngewkmen ban ioh don bynta ha ka Cannes bad ong ba ka long ka burom bakhraw ia ka ban shim bynta ha katei ka rynsan lem bad kiwei kiwei ki khlur ak phlim ki ri ka pyrthei.
Ha ki snem ba la leit ki la don ruh kiwei kiwei ki puron ka Bollywood kiba la ioh shim bynta lang sha Cannes bad kine ki long ruh ka Sonam Kapoor, Katrina Kaif, Kangana Ranaut bad Vidya Balan.
